ന്യൂഡൽഹി: ഡൽഹി വിമാനത്താവളത്തിൽ കോടികൾ വിലമതിക്കുന്ന വാച്ചുകൾ പിടികൂടി കസ്റ്റംസ്. 27 കോടി രൂപയുടെ വാച്ച് ഉൾപ്പെടെ വിലകൂടിയ ഏഴ് ടൈംപീസുകളാണ് കസ്റ്റംസ് ഇന്ന് പിടിച്ചെടുത്തത്.
പിടികൂടിയതിൽ ഡയമണ്ട് പതിച്ച വൈറ്റ് ഗോൾഡ് റിസ്റ്റ്‌വാച്ചിന് 27 കോടി രൂപ വിലവരുമെന്ന് കസ്റ്റംസ് പറയുന്നു. ഡയമണ്ട് പതിച്ച ബ്രേസ്‌ലെറ്റും കടത്താൻ ശ്രമിച്ചവയിലുണ്ട്. ദുബായിൽ നിന്നെത്തിയ യാത്രക്കാരനിൽ നിന്നാണ് ഇവ പിടികൂടിയത്.
അമേരിക്കൻ വാച്ച് നിർമ്മാതാക്കളായ ജേക്കബ് ആൻഡ് കമ്പനിയുടെ വാച്ചും പിടികൂടിയവയിലുണ്ട്. 76 വജ്രക്കല്ലുകൾ 18 കാരറ്റ് സ്വർണത്തിലാണ് പതിച്ചിരിക്കുന്നത്. ഇത് കസ്റ്റമൈസ് ചെയ്ത് നിർമ്മിച്ച വാച്ചാണെന്ന് അധികൃതർ പറയുന്നു.
മറ്റൊരു യാത്രക്കാരനിൽ നിന്ന് അഞ്ച് റോളക്‌സ് വാച്ചുകളും ഒരു പിയാഗെറ്റ് ലൈംലൈറ്റ് സ്റ്റെല്ല വാച്ചും പിടിച്ചെടുത്തു. സ്റ്റെല്ലയ്‌ക്ക് 31 ലക്ഷവും റോളക്‌സ് ഓരോന്നിനും 15 ലക്ഷവും വിലമതിക്കും. ആകെ 28 കോടി രൂപയുടെ വാച്ചുകളാണ് കസ്റ്റംസ് ഒറ്റദിവസം പിടികൂടിയത്.
