ഗാന്ധിനഗർ: ഗുജറാത്ത് തീരത്ത് ഇന്ത്യൻ തീരദേശ സേനയുടെ ഹെറോയിൻ വേട്ട. 350 കോടി രൂപ വിലവരുന്ന ഹെറോയിനാണ് എടിഎസ് പിടികൂടിയത്. പാകിസ്താൻ ബോട്ടായ അൽ സകറിൽ നിന്നും 50 കിലോ ഗ്രാം ഹെറോയിൻ സംഘം കണ്ടെടുത്തു. സംഭവവുമായി ബന്ധപ്പെട്ട് ആറ് പേരെ പോലീസ് കസ്റ്റഡിയിലെടുത്തിട്ടുണ്ട്.
അന്താരാഷ്ട്ര സമുദ്ര അതിർത്തിക്ക് സമീപത്ത് നിന്നും ശനിയാഴ്ച പുലർച്ചെയാണ് ഇവരെ പിടികൂടിയത്. കൂടുതൽ പരിശോധനകൾക്കായി ജഖാവുവിലേക്ക് ബോട്ട് കൊണ്ടുപോയി. കഴിഞ്ഞ സെപ്റ്റംബർ 14നും ഇത്തരത്തിൽ പാക് ബോട്ടിൽ നിന്ന് ഹെറോയിൻ കണ്ടെത്തിയിരുന്നതായി എടിഎസ് പറഞ്ഞു. 200 കോടി വിലമതിക്കുന്ന 40 കിലോ ഹെറോയിനാണ് അന്ന് പിടിച്ചെടുത്തത്.
അതേസമയം കൊച്ചിയിൽ പിടികൂടിയ ഹെറോയിൻ കേസിൽ എൻസിബി ഇന്ന് അറസ്റ്റ് രേഖപ്പെടുത്തി. ആറ് ഇറാനിയൻ പൗരന്മാരുടെ അറസ്റ്റാണ് രേഖപ്പെടുത്തിയത്. ഇവരെ ഇന്ന് കോടതിയിൽ ഹാജരാക്കും. ലഹരി ഇടപാടിന് പാക് ബന്ധമുണ്ടെന്ന വിവരവും ഇതിനിടെ പുറത്തുവന്നിരുന്നു. സംഭവത്തിൽ അന്വേഷണം പുരോഗമിക്കുകയാണ്.
