സിനിമാ പ്രേമികൾ ഇരുകയ്യും നീട്ടി സ്വീകരിച്ച തമിഴ് ചിത്രമാണ് ഗജനി. ലോകമെമ്പാടുമുള്ള ജനങ്ങളുടെ ഇഷ്ടതാരമായ സൂര്യയുടെ ജീവിതത്തിൽ വലിയ ഒരു വഴിത്തിരിവിന് ഈ ചിത്രം കാരണമായിട്ടുണ്ട്. എ ആർ മുരുഗദോസ് സംവിധാനം ചെയ്ത ചിത്രത്തിൽ നായികയായി എത്തിയത് മലയാളി താരം അസിനാണ്. ഇപ്പോഴിതാ ആരാധകരിൽ ആകാംഷ നിറച്ച് ചിത്രവുമായി ബന്ധപ്പെട്ട് വാർത്തകൾ പുറത്ത് വരികയാണ്. ഗജനിയുടെ രണ്ടാം ഭാഗം വരുന്നു എന്നാണ് റിപ്പോർട്ട്.
ഇതുമായി ബന്ധപ്പെട്ട് സംവിധായകൻ നടനുമായി ചർച്ച നടത്തി എന്നും. ഉടൻ തീരുമാനം ഉണ്ടാവും എന്നുമുള്ള വിവരങ്ങളാണ് പുറത്ത് വരുന്നത്. ഗജനിയുടെ രണ്ടാം ഭാഗം യാഥാർഥ്യമായാൽ ഇത് മൂന്നാം തവണയാണ് സൂര്യ മുരുഗദോസ് കോമ്പോ ഒന്നിക്കുന്നത്.
സഞ്ജയ് രാമസ്വാമി എന്ന കഥാപാത്രമായാണ് 2005 ൽ പുറത്തിറങ്ങിയ ഗജനിയിൽ സൂര്യ എത്തിയത്. അസിന് പുറമെ മലയാളിയായ നയൻതാരയും ചിത്രത്തിൽ നായികയായി എത്തിയിരുന്നു. രണ്ടാം ഭാഗം ഒരുങ്ങുമ്പോൾ നായികയായി നയൻതാര തന്നെ എത്തുമോ എന്ന സംശയമാണ് ആരാധകർ മുന്നോട്ട് വയ്ക്കുന്നത്.
ഗജനിക്ക് പുറമെ സൂര്യ മുരുഗദോസ് കോമ്പോ ഒന്നിച്ച് മറ്റൊരു ചിത്രം ഏഴാം അറിവാണ്. ശ്രുതി ഹസനാണ് ചിത്രത്തിൽ നായികയായി എത്തിയത്. തമിഴ് സിനിമയിൽ വ്യത്യസ്ത പ്രമേയവുമായി എത്തിയ ഈ ചിത്രത്തെയും ആരാധകർ നിറഞ്ഞ കൈയ്യോടെയാണ് സ്വീകരിച്ചത്. ഇന്ത്യയെ തകർക്കാൻ ചൈന രൂപപ്പെടുത്തുന്ന പദ്ധതിയും അതിനെ തുടർന്നു നടക്കുന്ന സംഭവവികാസങ്ങളുമാണ് ചിത്രത്തിൽ കാണിക്കുന്നത്. ചിത്രത്തിന് പുറമെ ഇതിലെ ഗാനങ്ങൾക്കും വലിയ സ്വീകാര്യതയാണ് ലഭിച്ചത്.
