ന്യൂഡല്ഹി: രാജ്യദ്രോഹ കേസില് ജയിലില് കഴിയുന്ന പോപ്പുലര്ഫ്രണ്ട് പ്രവര്ത്തകന് സിദ്ദിഖ് കാപ്പന്റെ ജാമ്യാപേക്ഷ പരിഗണിക്കുന്നത് ലഖ്നൗ ജില്ലാ കോടതി മാറ്റിവച്ചു. മുന് മുഖ്യമന്ത്രി മുലായം സിംഗ് യാദവിന്റെ മുലായം സിംഗ് യാദവിന്റെ നിര്യാണത്തെ തുടര്ന്ന് ദുഃഖാചരണം പ്രഖ്യാപിച്ചതോടെ അഭിഭാഷകര് ഹാജരായില്ല. ഇതേ തുടര്ന്നാണ് ജാമ്യാപേക്ഷ പരിഗണിക്കുന്നത് ബുധനാഴ്ചത്തേയ്ക്ക് മാറ്റിവെച്ചത്.
ഹര്ജി പരിഗണിക്കുന്നത് മുന്പും പലകാരണങ്ങളാല് മാറ്റിവെച്ചിരുന്നു. യുഎപിഎ കേസില് സുപ്രിംകോടതി കാപ്പന് ജാമ്യം അനുവദിച്ചിരുന്നു. എന്നാല് ഇ.ഡി കേസില് ജാമ്യം ലഭിക്കാത്തതിനാല് പുറത്തിറങ്ങാന് കഴിഞ്ഞിരുന്നില്ല. സെപ്തംബര് 29ന് കോടതി പരിഗണിച്ച കേസ് ജഡ്ജി അവധിയായതിനാല് പത്തിലേക്ക് മാറ്റുകയായിരുന്നു. ഇതിനിടെ ജാമ്യാപേക്ഷ പരിഗണിക്കണമെന്ന് ആവശ്യപ്പെട്ട് കാപ്പന്റെ അഭിഭാഷകന് കോടതിയെ സമീപിച്ചിരുന്നു.
2020 ഒക്ടോബര് അഞ്ചിനാണ് ഹത്രാസിലേക്കുള്ള വഴി മദ്ധ്യേ കാപ്പനെ പോലീസ് അറസ്റ്റ് ചെയ്തത്. ഹത്രാസില് പെണ്കുട്ടി കൊല്ലപ്പെട്ടതുമായി ബന്ധപ്പെട്ട് കലാപം സൃഷ്ടിക്കാന് എത്തിയപ്പോഴായിരുന്നു പോലീസ് നീക്കം. തുടര്ന്ന് നടത്തിയ അന്വേഷണത്തില് കാപ്പന് പോപ്പുലര് ഫ്രണ്ടുമായി ചേര്ന്ന് നടത്തിയ രാജ്യവിരുദ്ധ പ്രവര്ത്തനങ്ങള് പോലീസ് കണ്ടെത്തി. ഇതേ തുടര്ന്ന് ജയിലില് അടയ്ക്കുകയായിരുന്നു.
