കൊൽക്കത്ത: പശ്ചിമ ബംഗാളിലെ അദ്ധ്യാപക നിയമന അഴിമതിക്കേസുമായി ബന്ധപ്പെട്ട് തൃണമൂൽ കോൺഗ്രസ് എംഎൽഎ മാണിക് ഭട്ടാചാര്യയെ എൻഫോഴ്‌സ്‌മെന്റ് ഡയറക്ടറേറ്റ് അറസ്റ്റ് ചെയ്തു. കഴിഞ്ഞ ദിവസം രാത്രി നടന്ന ചോദ്യം ചെയ്യലിന് പിന്നാലെയാണ് അറസ്റ്റ്.
അഴിമതിക്കേസിൽ ബംഗാൾ മുൻ മന്ത്രിയും തൃണമൂലിന്റെ പ്രധാന നേതാവുമായിരുന്ന പാർത്ഥ ചാറ്റർജിയും അദ്ദേഹത്തിന്റെ അടുത്ത സഹായി അർപിത മുഖർജിയും അറസ്റ്റിലായി മാസങ്ങൾക്ക് ശേഷമാണ് മറ്റൊരു തൃണമൂൽ നേതാവിന്റെ അറസ്റ്റ് രേഖപ്പെടുത്തുന്നത്. ഭട്ടാചാര്യയെ വൈദ്യപരിശോധനയ്‌ക്ക് വിധേയനാക്കി ഇന്ന് കോടതിയിൽ ഹാജരാക്കും.
ബംഗാളിലെ പാലാഷിപാറ നിയോജക മണ്ഡലത്തിൽ നിന്നുള്ള എംഎൽഎയാണ് ഭട്ടാചാര്യ. കൊൽക്കത്തയിലെ ജാദവ്പൂർ പ്രദേശത്തുള്ള ഭട്ടാചാര്യയുടെ വസതിയിൽ നടത്തിയ പരിശോധനയിൽ അദ്ധ്യാപന കുംഭകോണവുമായി ബന്ധപ്പെട്ട സുപ്രധാനമായ പല രേഖകളും കണ്ടെടുത്തിരുന്നു. ഇതിന് പിന്നാലെയാണ് ചോദ്യം ചെയ്യാൻ വിളിപ്പിച്ചതും തുടർന്ന് ഇഡിയുടെ അറസ്റ്റുണ്ടാകുകയും ചെയ്തത്.
