എറണാകുളം: ഇലന്തൂരിലെ ഇരട്ട ആഭിചാര കൊലപാതകങ്ങൾക്ക് പിന്നാലെ ഏജന്റ് ഷാഫി കൂടുതൽ സ്ത്രീകളെ സമീപിച്ചിരുന്നതായി വെളിപ്പെടുത്തൽ. ഈ സ്ത്രീകൾ പോലീസിന് നൽകിയ നിർണായക വിവരങ്ങളാണ് ആഭിചാര കൊലയെക്കുറിച്ച് പുറം ലോകം അറിയുന്നതിന് കാരണമായത്. ആഭിചാര കൊലയ്ക്ക് ഇരയായ ലോട്ടറി വിൽപ്പനക്കാരി പത്മത്തെക്കുറിച്ചുള്ള അന്വേഷണത്തിനിടെയായിരുന്നു പോലീസ് ഇവരുടെ പക്കൽ എത്തിയത്.
കടവന്ത്ര സ്വദേശിനികളും ലോട്ടറി വിൽപ്പനക്കാരുമായ സ്ത്രീകളാണ് കൊച്ചി പോലീസിന് നിർണായക വിവരങ്ങൾ കൈമാറിയത്. പത്മയെ കാണാനില്ലെന്ന പരാതിയ്ക്ക് പിന്നാലെ പോലീസ് കടവന്ത്രയിലെ ലോട്ടറി വിൽപ്പനക്കാരായ ഇവരിൽ നിന്നും മൊഴിയെടുത്തിരുന്നു. ഇതിനിടെയാണ് ഷാഫിയെക്കുറിച്ച് ഇവർ പോലീസിനോട് പറഞ്ഞത്. പത്മയുടെ ഫോൺ കേന്ദ്രീകരിച്ച് നടത്തിയ പരിശോധനയിൽ മൊബൈൽ ടവർ ലൊക്കേഷൻ അവസാനമായി കാണിച്ചത് തിരുവല്ലയിലാണെന്ന് പോലീസ് ലോട്ടറി വിൽപ്പനക്കാരായ സ്ത്രീകളോട് പറഞ്ഞിരുന്നു. ഇതോടെയാണ് പിന്നിൽ ഷാഫിയാണെന്ന് സ്ത്രീകൾക്ക് വ്യക്തമായത്.
തിരുവല്ലയിലേക്ക് പോകണമെന്ന് പറഞ്ഞ് തങ്ങളുൾപ്പെടെ മൂന്ന് നാല് പേരെ ഷാഫി സമീപിച്ചിരുന്നുവെന്നായിരുന്നു സ്ത്രീകൾ പോലീസിനോട് പറഞ്ഞത്. തിരുവല്ലയിൽ ഒരു ഭാര്യയും ഭർത്താവുമുണ്ട്. അയാൾക്ക് വലിയ സ്വത്തും തോട്ടങ്ങളും ഉണ്ട്. അവരിൽ നിന്ന് രണ്ട് ലക്ഷം രൂപ വാങ്ങിയെടുക്കാം. ഒരു ലക്ഷം രൂപ തങ്ങൾക്ക് തരാമെന്ന് ഷാഫി പറഞ്ഞതായി സ്ത്രീകൾ പോലീസിന് മൊഴി നൽകിയിരുന്നു.
