ചെന്നൈ: മാതാപിതാക്കളായ തെന്നിന്ത്യൻ സൂപ്പർ താരം നയൻ താരയ്ക്കും, സംവിധായകൻ വിഘ്നേഷിനും ആശംസകൾ നേർന്ന് തമിഴ് നടൻ കാർത്തി. ഇരുവർക്കും പൂച്ചെണ്ടുകൾ അയച്ച് നൽകി. ഇതിനൊപ്പം സ്വന്തം കൈപ്പടയിൽ എഴുതിയ ആശംസകാർഡും നൽകിയിരുന്നു.
സമൂഹമാദ്ധ്യമത്തിലൂടെ കഴിഞ്ഞ ദിവസമാണ് നയൻതാരയും വിഘ്നേഷ് ശിവനും മാതാപിതാക്കളായ സന്തോഷ വാർത്ത പങ്കുവെച്ചത്. ഇതിന് പിന്നാലെയാണ് കാർത്തി ഇരുവർക്കും ആശംസകൾ നേർന്ന് പൂച്ചെണ്ടുകൾ നൽകിയത്. ‘മാതൃത്വത്തിലേക്കും, പിതൃത്വത്തിലേക്കും സ്വാഗതം’,നാല് പേരെയും ദൈവം അനുഗ്രഹിക്കട്ടെ’ എന്നായിരുന്നു കാർത്തിയുടെ ആശംസ. കാർത്തി നൽകിയ പൂച്ചെണ്ടും ആശംസാ കുറിപ്പും വിഘ്നേഷ് ആണ് സമൂഹമാദ്ധ്യമത്തിലൂടെ പങ്കുവെച്ചത്.
വാടക ഗർഭ പാത്രം വഴി ഇരട്ട ആൺകുഞ്ഞുങ്ങളാണ് നയൻതാരയ്ക്കും വിഘ്നേഷ് ശിവനും ജനിച്ചത്. ഈ വിവരം വിഘ്നേഷ് സമൂഹമാദ്ധ്യമത്തിലൂടെയായിരുന്നു പുറത്തുവിട്ടത്. നയനും താനും അമ്മയും, അച്ഛനുമായെന്നും, തങ്ങൾക്ക് ഇരട്ട ആൺകുട്ടികൾ ജനിച്ചെന്നുമായിരുന്നു വിഘ്നേഷ് സമൂഹമാദ്ധ്യമങ്ങളിൽ പങ്കുവെച്ചത്. ഇതിന് പിന്നാലെ നിരവധി പേർ താര ദമ്പതികൾക്ക് ആശംസകൾ നേർന്നിരുന്നു.
