ചിത്രം ഇറങ്ങുന്നതിന് മുന്നേ നാല് കോടിയുടെ സമ്മാനം; ‘ആദിപുരുഷ്’ സംവിധായകന് ഫെരാരിയുടെ സൂപ്പർകാർ സമ്മാനിച്ച് നിർമ്മാതാവ്

പ്രഭാസ് നായകനായെത്തുന്ന പാൻ ഇന്ത്യൻ ബിഗ് ബജറ്റ് ചിത്രം ആദിപുരുഷിന്റെ സംവിധായകന് 4 കോടിയുടെ സൂപ്പർ കാർ സമ്മാനിച്ച് നിർമ്മാതാവ്. ഫെരാരി എഫ് 8 ട്രിബ്യൂട്ടോ ആണ് ചിത്രത്തിന്റെ സംവിധായകൻ ഔം റൗട്ടിന് നിർമ്മാതാവായ ഭൂഷൺ കുമാർ സമ്മാനിച്ചത്. 4.02 കോടി രൂപയാണ് കാറിന്റെ വില. നേരത്തെ ടി സീരിസിന്റെ പേരിൽ രജിസ്റ്റർ ചെയ്ത കാറാണ് സംവിധായകൻ ഓം റൗട്ടിന് നൽകിയത്. ഇരുവരും നഗരത്തിലൂടെ വാഹനം ഓടിച്ച് പോകുന്നതിന്റെ അടക്കമുള്ള വീഡിയോ സമൂഹമാദ്ധ്യമങ്ങളിൽ വൈറലാണ്.

ചിത്രം പുറത്തിറങ്ങുന്നതിന് മുൻപ് തന്നെ നൽകിയ സമ്മാനം മാദ്ധ്യമങ്ങളിൽ അടക്കം വലിയ വാർത്തയാണ്. അതേസമയം ആദിപുരുഷ് ചിത്രത്തിന്റെ ടീസർ പുറത്തിറങ്ങിയത് മുതൽ ചിത്രത്തിനെതിരെ വലിയ രീതിയിലുള്ള ട്രോളുകളാണ് ഉയരുന്നത്. സെയ്ഫ് അലി ഖാൻ, കൃതി സനോൺ തുടങ്ങിയവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. വിഎഫ്എക്‌സിന് ഏറെ പ്രാധാന്യമുള്ള സിനിമയുടെ ബജറ്റ് 500 കോടി രൂപയാണ്.

ഫെരാരിയുടെ ഏറ്റവും മികച്ച കാറുകളിലൊന്നാണ് എഫ് 8 ട്രിബ്യൂട്ടോ. 3.9 ലിറ്റർ ട്വിൻ-ടർബോചാർജ്ഡ് വി8 എഞ്ചിനാണ് വാഹനത്തിൽ ഉപയോഗിച്ചിരിക്കുന്നത്. എഞ്ചിന് 710 bhp കരുത്തും 770Nm ടോർക്കും ഉണ്ട്. വെറും 2.9 സെക്കന്റിനുള്ളിൽ വാഹനം 100 കിലോമീറ്റർ വേഗത കൈവരിക്കുന്നു. മണിക്കൂറിൽ 340 കിലോമീറ്ററാണ് വാഹനത്തിന്റെ പരമാവധി വേഗത.