വൃത്തി എന്ന് ആലോചിക്കുമ്പോൾ ആദ്യം മനസിലേക്ക് ഓടിയെത്തുന്ന ഒന്നാണ് ശരീരം വൃത്തിയാക്കൽ. കുളിക്കാനും,കൈ കഴുകാനും കാൽ കഴുകാനും മുഖം കഴുകാനുമൊക്കെ നമ്മളിൽ ഭൂരിഭാഗവും ഉപയോഗിക്കുന്നത് സോപ്പാണ്. എങ്ങനെയാണ് നമ്മൾ സോപ്പ് തിരഞ്ഞെടുക്കുന്നത്? ചിലർ മണം നോക്കി വാങ്ങും,ചിലർ നിറം നോക്കിയും പത നോക്കിയും ബ്രാൻഡ് നോക്കിയും സോപ്പിലെ ചേരുവകൾ നോക്കിയും വരെ വാങ്ങിക്കുന്നവരുണ്ട്.
ഇത്തരത്തിൽ നല്ല നിറവും മണവും പതയും സോപ്പുകൾക്ക് നൽകുന്നത് പലപ്പോഴും സിന്തറ്റിക് വസ്തുക്കളായിരിക്കും.ഇവ ചർമത്തിന്റെ സ്വാഭാവികത കളയുകയും ദോഷം വരുത്തുകയും ചെയ്യും.കെമിക്കലുകളാൽ നിറഞ്ഞ സോപ്പുകൾ ചർമ്മത്തിനെ പ്രശ്‌നത്തിലാക്കും. അലർജി പോലുള്ള പല പ്രശ്നങ്ങൾ, ചർമം വരണ്ടുപോകുന്നത് എന്നിവയ്‌ക്ക് കാരണമാകും. ചർമം വരണ്ട് പോകുന്നത് കൊണ്ടു തന്നെ ചർമത്തിൽ ചുളിവുകളും വരകളുമെല്ലാം വീഴാൻ വലിയ സാധ്യതയുമുണ്ട്. ഇതു വഴി ചർമം അയയാനും അയഞ്ഞു തൂങ്ങാനും ഇടയാക്കുകയും ചെയ്യും.
സോപ്പ് വാങ്ങുമ്പോൾ വെളുത്ത നിറത്തിലെ സോപ്പുകൾ നോക്കി വാങ്ങുന്നതാണ് കൂടുതൽ നല്ലത്. അധികം പതയാത്തതും അധികം മണമുള്ളതുമായവയും ഒഴിവാക്കുക.ചിലർ ക്ലിയറായ സോപ്പുപയോഗിയ്‌ക്കാറുണ്ട്. ഇതിൽ പൊതുവേ പതയും കുറവാകും.ഇത്തരം ചില സോപ്പുകൾ ആൽക്കഹോൾ, ഗ്ലൈക്കോളിക് ആസിഡ് എന്നിവ ഉപയോഗിച്ചാണ് തയ്യാറാക്കുന്നത്. ഇവ ചർമം കേടു വരുത്തും.
ഒലീവ് ഓയിൽ, ആട്ടിൻ പാൽ തുടങ്ങിയ സ്വാഭാവിക വസ്തുക്കളാൽ തയ്യാറാക്കിയ സോപ്പുകൾ വാങ്ങുന്നതാണ് നല്ലത്. സുഗന്ധം വേണമെങ്കിൽ പൂക്കളുടേയും ചില എണ്ണകളുടേയുമെല്ലാം സ്വാഭാവിക ചേരുവകൾ ചേർത്ത സോപ്പുകൾ വാങ്ങുന്നതും ഗുണകരമാണ്.
