ന്യൂഡൽഹി: തെലങ്കാന രാഷ്ട്രീയ സമിതി നേതാവും മുൻ ഭോംഗിർ എം പിയുമായ ബൂറ നരസയ്യ ഗൗഡിന്റെ ബിജെപി പ്രവേശനം ഉടനെന്ന് സൂചന. തെലങ്കാനയുടെ ചുമതലയുള്ള ബിജെപി നേതാവ് തരുൺ ചുഗുമായി ഗൗഡ് ഡൽഹിയിൽ പല തവണ കൂടിക്കാഴ്ച നടത്തി. പിന്നാലെ, ബിജെപി ദേശീയ അദ്ധ്യക്ഷൻ ജെ പി നദ്ദയുമായും അദ്ദേഹം കൂടിക്കാഴ്ച നടത്തി.
തെലങ്കാന സംസ്ഥാന രൂപീകരണത്തിനായി നിർണ്ണായക പ്രക്ഷോഭങ്ങൾ സംഘടിപ്പിച്ച നേതാവാണ് ബൂറ നരസയ്യ ഗൗഡ്. ടി ആർ എസിൽ അപമാനിതനാകുകയും അവഗണിക്കപ്പെടുകയും ചെയ്യുന്നത് കൊണ്ടാണ് അദ്ദേഹം പാർട്ടി വിട്ടത് എന്നാണ് സൂചന.
തെലങ്കാനയിൽ കെ സി ആറിന്റെ ഭരണത്തിൻ കീഴിൽ അഴിമതി, സ്വജനപക്ഷപാതം, ഭരണഘടനാ വിരുദ്ധത, അഹംഭാവം എന്നിവ നിമിത്തം ജനങ്ങൾ പൊറുതി മുട്ടിയിരിക്കുകയാണെന്ന് ബിജെപി ആരോപിക്കുന്നു. ബൂറ നരസയ്യ ഗൗഡിനെ പോലെ ഒരു നേതാവിന് ഈ രാഷ്ട്രീയ സാഹചര്യം അസഹ്യമായി തോന്നുന്നതിനാലാവാം അദ്ദേഹം മാറി ചിന്തിക്കാൻ തയ്യാറാകുന്നത് എന്നാണ് ബിജെപി നേതാക്കൾ ചൂണ്ടിക്കാട്ടുന്നത്.
ഗൗഡ് സമുദായത്തിനിടയിൽ നിർണ്ണായക സ്വാധീനമുള്ള നേതാവാണ് ബൂറ നരസയ്യ. അദ്ദേഹം ബിജെപിയിൽ എത്തുന്നത് പാർട്ടിയുടെ സ്വാധീനം ജനങ്ങൾക്കിടയിൽ കൂടുതൽ ദൃഢമാകാൻ കാരണമാകുമെന്നാണ് ബിജെപി നേതാക്കളുടെ വിശകലനം.
