ന്യൂഡൽഹി: ഹിന്ദിയിൽ മെഡിക്കൽ വിദ്യാഭ്യാസം നൽകാനുള്ള മദ്ധ്യപ്രദേശ് സർക്കാരിന്റെ സംരംഭത്തെ അഭിനന്ദിച്ച് പ്രധാനമന്ത്രി നരേന്ദ്ര മോദി. രാജ്യം ബൃഹത്തായ മാറ്റത്തിന് തയ്യാറെടുക്കുന്നതായും അദ്ദേഹം പറഞ്ഞു. ഹിന്ദിയിൽ മെഡിക്കൽ വിദ്യാഭ്യാസം യാഥാർത്ഥ്യമാകുന്നതോടെ ലക്ഷക്കണക്കിന് വിദ്യാർത്ഥികൾക്കാണ് ഉപകാരപ്പെടുന്നതെന്നും അവസരങ്ങളും വർദ്ധിക്കുമെന്നും മോദി വ്യക്തമാക്കി.
രാജ്യത്തെ ആദ്യ ഹിന്ദി എംബിബിഎസ് പാഠ പുസ്തക പ്രകാശനം കേന്ദ്രമന്ത്രി അമിത് ഷാ നിർവഹിച്ചതിന് പിന്നാലെയാണ് പ്രധാനമന്ത്രിയുടെ പ്രതികരണം. ഒന്നാം വർഷ വിദ്യാർത്ഥികൾക്കായുള്ള മൂന്ന് പുസ്തകങ്ങളാണ് ഹിന്ദിയിൽ അവതരിപ്പിച്ചത്. ബയോകെമിസ്ട്രി, അനാട്ടമി, മെഡിക്കൽ ഫിസിയോളജി എന്നിവയുടെ പുസ്തകങ്ങളാണ് ഹിന്ദിയിൽ അവതരിപ്പിച്ചത്.
ചരിത്രത്തിലെ സുപ്രധാന ദിനമെന്നും ഭാവിയിൽ ചരിത്രമെഴുതുമ്പോൾ ഈ ദിനവും എഴുതപ്പെടുമെന്നും അദ്ദേഹം പറഞ്ഞിരുന്നു. സർക്കാർ ഹിന്ദിയിൽ മെഡിക്കൽ പഠനം ആരംഭിച്ച് പ്രധാനമന്ത്രി മോദിയുടെ സ്വപ്നം സാക്ഷാത്കരിച്ചതിൽ അഭിമാനമുണ്ടെന്ന് ഭോപ്പാലിൽ നടന്ന പരിപാടിയിൽ അമിത് ഷാ പറഞ്ഞു. ഈ നിമിഷം രാജ്യത്തെ വിദ്യാഭ്യാസ മേഖലയുടെ പുനരുജ്ജീവനത്തെ അടയാളപ്പെടുത്തുന്നുവെന്നും പ്രധാനമന്ത്രിയോട് നന്ദി പറയുന്നതായും പ്രകാശന ചടങ്ങിൽ അമിത് ഷാ വ്യക്തമാക്കി.
