പത്തനംതിട്ട: ഇലന്തൂർ ഇരട്ട ആഭിചാര കൊലക്കേസിലെ പ്രതികൾക്ക് മേൽ കൂടുതൽ കുറ്റം ചുമത്താൻ അന്വേഷണ സംഘം. പീഡനക്കുറ്റം കൂടി മൂന്ന് പേർക്കും മേൽ ചുമത്താനാണ് അന്വേഷണ സംഘത്തിന്റെ ആലോചന. ഇതിനായി അന്വേഷണ സംഘം നിയമോപദേശം തേടി.
പീഡനക്കുറ്റം ചുമത്താൻ കഴിയുമെങ്കിൽ ഈ വകുപ്പ് കൂടി ചുമത്തിയാകും കുറ്റപത്രം സമർപ്പിക്കുക. ഇതിന്റെ ഭാഗമായി പ്രതികളായ ഷാഫിയുടെയും ഭഗവൽ സിംഗിന്റെയും ശേഷി പരിശോധന നടത്തി. പ്രതികൾക്ക് മേൽ മോഷണക്കുറ്റം കൂടി ചുമത്തിയാകും കുറ്റപത്രം.
നിലവിൽ പോലീസ് കസ്റ്റഡിയിലാണ് പ്രതികൾ. കഴിഞ്ഞ ദിവസങ്ങളായി ഇവരെ വിവിധയിടങ്ങളിൽ എത്തിച്ച് പോലീസ് തെളിവെടുപ്പ് നടത്തുകയാണ്. ഇന്നും തെളിവെടുപ്പ് തുടരും. ഇതിനിടെ പ്രതികളെ ചോദ്യം ചെയ്യുന്നതും തുടരുകയാണ്.
ഇന്നലെ നടത്തിയ ചോദ്യം ചെയ്യലിൽ നിർണായക വിവരങ്ങൾ ആയിരുന്നു പുറത്തുവന്നത്. ഇലന്തൂരിലെ ആഭിചാര കൊലകൾക്ക് മുൻപ് ഷാഫി മറ്റൊരു കൊല കൂടി ചെയ്തെന്ന് ആയിരുന്നു പ്രതി ലൈല പോലീസിനോട് പറഞ്ഞത്. ഇതിൽ അന്വേഷണം ആരംഭിച്ചിട്ടുണ്ട്.
