വാഷിംഗ്ടൺ: പത്മ ഭൂഷൺ ലഭിച്ചതിൽ അഭിമാനമുണ്ടെന്ന് മൈക്രോ സോഫ്റ്റ് സിഇഒ സത്യ നദെല്ല. സാങ്കേതിക വിദ്യ ഉപയോഗിച്ച് കൂടുതൽ നേട്ടങ്ങൾ കൈവരിക്കുമെന്നും ഇന്ത്യയിലെ ജനങ്ങൾക്ക് സാങ്കേതിക വിദ്യ കൂടുതൽ പ്രയോജനകരമാകാൻ തുടർന്നും പ്രവർത്തിക്കാൻ ആഗ്രഹിക്കുന്നുവെന്നും നാദെല്ല പറഞ്ഞു. വരുന്ന ജനുവരിയിൽ ഇന്ത്യ സന്ദർശിക്കുമെന്നും അദ്ദേഹം വ്യക്തമാക്കി. സാൻഫ്രാൻസിസ്‌കോയിലെ ഇന്ത്യൻ കോൺസൽ ജനറൽ ഡോ.ടി.വി.നാഗേന്ദ്ര പ്രസാദിൽ നിന്നും ഔദ്യോഗികമായി പുരസ്‌കാരം ഏറ്റുവാങ്ങി.
പത്മഭൂഷൺ ലഭിച്ചതിലും നിരവധി പേരുടെ അംഗീകാരം ലഭിച്ചതിലും അഭിമാനമുണ്ടെന്നും ഇനിയും രാജ്യത്ത് നിരവധി പദ്ധതികൾ അവതരിപ്പിക്കുമെന്നും അദ്ദേഹം അറിയിച്ചു. രാഷ്‌ട്രപതി ദ്രൗപദി മുർമു, പ്രധാനമന്ത്രി നരേന്ദ്ര മോദി, ഇന്ത്യയിലെ ജനങ്ങൾ എന്നിവർക്ക് നദല്ലെ നന്ദി രേഖപ്പെടുത്തുകയും ചെയ്തു.
രാജ്യത്തിന്റെ വികസനത്തിൽ സാങ്കേതിക വിദ്യ വഹിക്കുന്ന പങ്കിനെക്കുറിച്ച് അദ്ദേഹം സംസാരിച്ചു. ഇന്ത്യയുടെ വളർച്ചാ പാതയെ കുറിച്ചും ആഗോള തലത്തിൽ മെച്ചപ്പെട്ട നിലയിലേക്ക് ഇന്ത്യ ഉയരാനുള്ള സാദ്ധ്യതകളെ സംബന്ധിച്ചും അദ്ദേഹവുമായി ഇന്ത്യൻ പ്രതിനിധികൾ ചർച്ച നടത്തി. സാമ്പത്തിക, സാമൂഹിക, സാങ്കേതികപരമായ മാറ്റങ്ങളുടെ കാലഘട്ടത്തിലാണ് ജീവിക്കുന്നതെന്ന് ഡോ പ്രസാദുമായുള്ള കൂടിക്കാഴ്ചയ്‌ക്ക് ശേഷം നാദെല്ല പറഞ്ഞു.
അടുത്ത ദശകം ഡിജിറ്റൽ സാങ്കേതികവിദ്യയാൽ നിർവ്വചിക്കപ്പെടും. ചെറുകിട-വൻകിട വ്യവസായങ്ങളും ഓർഗനൈസേഷനുകളും സാങ്കേതിക വിദ്യയിലേക്ക് തിരിയുന്നത് മാറ്റത്തിന്റെ ലക്ഷണമാണെന്നും അദ്ദേഹം സൂചിപ്പിച്ചു. ഹൈദരാബാദ് സ്വദേശിയാണ് സത്യ നദെല്ല. 2014-ലാണ് മൈക്രോസോഫ്റ്റിന്റെ സിഇഒ പദവിയിലെത്തിയത്. തുടർന്ന് 2021-ലാണ് ചെയർമാനായത്.
Comments