ഉറക്കത്തെയും ഉറക്കക്കുറവിനെയും പറ്റി കാര്യമായ ആവലാതികൾ ഇല്ലാത്തവരായിരുന്നു കുറച്ചു കാലം മുൻപ് വരെ മലയാളികൾ. എന്നാൽ, ജീവിതശൈലിയിൽ ഉണ്ടായ മാറ്റങ്ങൾ ഉറക്കക്കുറവും അനുബന്ധ ആരോഗ്യ പ്രശ്നങ്ങളും മലയാളികളുടെ ജീവിതത്തിന്റേയും ഭാഗമാക്കി. മാനസിക പ്രശ്നങ്ങൾ, പൊണ്ണത്തടി, ജീവിതശൈലീ രോഗങ്ങൾ എന്നിവയ്ക്കൊപ്പം കൊറോണയുടെ വരവും നമ്മുടെ ഉറക്കത്തെ ദോഷകരമായി ബാധിക്കാൻ തുടങ്ങി.
ശരിയായ ഉറക്കം ലഭിക്കാത്തത് പല തരത്തിലുള്ള ആരോഗ്യ പ്രശ്നങ്ങൾക്കും കാരണമാകുന്നതായി ഡോക്ടർമാർ അഭിപ്രായപ്പെടുന്നു. വിഷാദ രോഗം, ഉത്കണ്ഠ, ഹൈപ്പർ ടെൻഷൻ, ഹൃദ്രോഗം, മസ്തിഷ്ക രോഗങ്ങൾ എന്നിവ ഉറക്കക്കുറവ് മൂലം ഉണ്ടാകുന്നു. ശരിയായ ഉറക്കം ലഭിക്കാൻ ഡോക്ടർമാർ നിർദ്ദേശിക്കുന്ന ചില പ്രായോഗിക മാർഗങ്ങൾ പരിചയപ്പെടാം.
1. ഉറങ്ങാൻ ഉപയോഗിക്കുന്ന മുറി ശാന്തവും അനാവശ്യമായ ഒച്ചകൾ ഇല്ലാത്തതും ആയിരിക്കണം. ബെഡ് റൂമിൽ നിന്നും ടെലിവിഷൻ ഒഴിവാക്കുക.
2. സന്ധ്യക്ക് ശേഷം ഒച്ചപ്പാടും ബഹളവുമുള്ള ടെലിവിഷൻ പരിപാടികൾ കാണുന്നത് ഒഴിവാക്കുക.
3. ബെഡ് റൂം വൃത്തിയായി സൂക്ഷിക്കുക.
4. ശബ്ദം കുറച്ച്, മൃദുവായ സംഗീതം മാത്രം ബെഡ് റൂമിൽ കേൾക്കുക.
5. ഉറങ്ങുന്നതിന് മുൻപ് ചായ, കാപ്പി തുടങ്ങിയവ കഴിക്കുന്നത് ഒഴിവാക്കുക.
6. ഉറങ്ങുന്നതിന് മുൻപ് വയർ നിറയെ ഭക്ഷണം കഴിക്കാതിരിക്കുക. ഉറങ്ങുന്നതിന് മുൻപ് മദ്യം കഴിക്കാതിരിക്കുക.
7. അത്താഴത്തിന് ശേഷം അൽപ്പനേരം നടക്കുക.
8. സന്ധ്യക്ക് ശേഷം ബെഡ് റൂമിൽ മങ്ങിയ വെളിച്ചം മാത്രം ഉപയോഗിക്കുക.
9. പകൽ ഉറക്കം ഒഴിവാക്കുക.
