കീവ്: യുക്രെയ്‌നെ പൂർണ്ണമായും തകർക്കുന്ന തരത്തിലേയ്‌ക്ക് റഷ്യ ആക്രമണം ശക്തമാക്കുന്നു. പാശ്ചാത്യശക്തികളുടെ പിൻബലത്തിൽ പ്രത്യാക്രമണം നടത്തുന്ന പശ്ചാത്തലത്തിലാണ് യുക്രെയ്‌നെ മൊത്തം ഇരുട്ടിലാക്കുന്ന തരത്തിലേയ്‌ക്ക് റഷ്യ ആക്രമണം വ്യാപകമാക്കുന്നത്. ഡ്രോണുകൾ ഉപയോഗിച്ചുള്ള ആക്രമണമാണ് വ്യാപിപ്പിക്കുന്നത്. വൈദ്യുതി നിലയങ്ങളും ജലവിതരണവും തടസ്സപ്പെടുത്തി സമ്മർദ്ദമുണ്ടാക്കാനാണ് ശ്രമം. നിലവിൽ മൂന്ന് പവർ ഗ്രിഡുകൾ തകർത്തെന്ന് സെലൻസ്കി ആരോപിച്ചു.
യുക്രെയ്‌നിലെ ദേശീയ ഗ്രിഡിൽ പല തവണ വൈദ്യുതി നിലയ്‌ക്കുകയാണ്. സാധാരണ ക്കാരയ ജനങ്ങളെല്ലാം മെഴുകുതിരി വെട്ടത്തിലേയ്‌ക്ക് മാറിയിരിക്കുന്നതായും യുക്രെയ്ൻ മാദ്ധ്യമങ്ങൾ റിപ്പോർട്ട് ചെയ്യുന്നു. ആക്രമണം റഷ്യ വർദ്ധിപ്പിച്ചാൽ സർക്കാർ സംവിധാനം നിശ്ചലമാകുമെന്ന അവസ്ഥയാണെന്നും ജനങ്ങൾ ഭയക്കുന്നു.
ശൈത്യകാലം ആരംഭിച്ചതോടെ യൂറോപ്പൊന്നാകെ പ്രതിസന്ധിയിലേയ്‌ക്ക് നീങ്ങുമെ ന്നാണ് മുന്നറിയിപ്പ്. കനത്ത തണുപ്പിൽ റൂം ഹീറ്ററുകളും മറ്റ് ഉപകരണങ്ങൾ പ്രവർത്തിപ്പിക്കാനാകാതെ ജനങ്ങൾ വിഷമിക്കുകയാണ് . റഷ്യ പൈപ്പ് ലൈൻ പൂട്ടിയതി ലൂടെ നാൽപ്പത് ശതമാനത്തോളം ഇന്ധന ലഭ്യതയിലാണ് കുറവ് വന്നിരിക്കുന്നത്.
