ന്യൂഡൽഹി: പോലീസ് സ്മൃതി ദിനത്തിൽ രാജ്യത്തെ പോലീസ് സേനയ്ക്ക് കേന്ദ്ര ആഭ്യന്തരമന്ത്രി അമിത് ഷായുടെ സല്യൂട്ട്. രാജ്യത്തിന്റെ വികസനത്തിലും പങ്കാളികളാണ് പോലീസ് സേനയെന്ന് അദ്ദേഹം പറഞ്ഞു. ആഭ്യന്തര സുരക്ഷ ഉറപ്പുവരുത്തി അതിർത്തി കാത്ത് രാജ്യ പുരോഗതിക്ക് കൂടിയാണ് പോലീസ് സേന സാഹചര്യമൊരുക്കുന്നതെന്നും അമിത് ഷാ പറഞ്ഞു. പോലീസ് സ്മൃതി ദിനത്തോട് അനുബന്ധിച്ച് ജോലിക്കിടെ ജീവൻ ത്യജിച്ച പോലീസുകാർക്ക് ആദരാഞ്ജലി അർപ്പിച്ച് ഡൽഹിയിലെ നാഷണൽ പോലീസ് മെമ്മോറിയലിൽ സംസാരിക്കുകയായിരുന്നു അദ്ദേഹം.
രാജ്യത്തിന്റെ ആഭ്യന്തര സുരക്ഷയിൽ കഴിഞ്ഞ എട്ട് വർഷത്തിനിടെ വലിയ പുരോഗതിയാണ് ഉണ്ടായത്. അത് കശ്മീരിലായാലും വടക്ക് കിഴക്കൻ സംസ്ഥാനങ്ങളിലായാലും കമ്യൂണിസ്റ്റ് ഭീകരവാദം ശക്തമായ മേഖലകളിലായാലും വികസനത്തിന്റെ പുതിയ അദ്ധ്യായവും സമാധാനവുമാണ് കാണാനാകുന്നതെന്ന് അമിത് ഷാ ചൂണ്ടിക്കാട്ടി. ഇതിനായി പോലീസ് സേനാംഗങ്ങൾ വലിയ ഉത്തരവാദിത്വമാണ് ഏറ്റെടുത്തിട്ടുളളതെന്നും ആഭ്യന്തരമന്ത്രി പറഞ്ഞു.
ആഭ്യന്തര സുരക്ഷയിൽ കേന്ദ്രസർക്കാർ സ്വീകരിക്കുന്ന നടപടികൾക്ക് അനുസരിച്ച് ചുവടുവെയ്ക്കുന്നത് പോലീസ് സേനയാണെന്നും അമിത് ഷാ പറഞ്ഞു. പോലീസ് സേനയുടെ ക്ഷേമം ലക്ഷ്യമിട്ടുളള നിരവധി നടപടികളാണ് നരേന്ദ്രമോദി സർക്കാർ കൈക്കൊണ്ടിട്ടുളളതെന്നും അദ്ദേഹം കൂട്ടിച്ചേർത്തു.
കർത്തവ്യ നിർവ്വഹണത്തിനിടെ ജീവൻ ത്യജിച്ച പോലീസ് ഉദ്യോഗസ്ഥരുടെ സ്മരണാർത്ഥമാണ് ഒക്ടോബർ 21 ന് പോലീസ് സ്മൃതിദിനമായി ആചരിക്കുന്നത്. ഡൽഹിയിൽ സിആർപിഎഫിന്റെ നേതൃത്വത്തിലും പോലീസ് സ്മൃതിമണ്ഡപത്തിൽ പരിപാടികൾ സംഘടിപ്പിച്ചിരുന്നു.
