ന്യൂയോർക്ക്: ലോകത്തിലെ ഏറ്റവും വലിയ ക്രൂയിസ് കപ്പലിന്റെ വിശേഷങ്ങളാണ് ഇപ്പോൾ ചർച്ചയാകുന്നത്. 15 റെസ്റ്റോറന്റുകളും ഏഴ് സ്വിമ്മിംഗ് പൂളുകളും അടങ്ങുന്ന ‘ഐക്കൺ ഓഫ് ദ സീസ്’ എന്ന ഈ കപ്പലിൽ 7,600 അതിഥികളെ ഉൾക്കൊള്ളിക്കാൻ സാധിക്കുമെന്നതാണ് പ്രത്യേകത. പ്രശസ്ത കപ്പൽ നിർമ്മാതാവായ മെയെർ ടുർക്കുവാണ് യുഎസ് ആസ്ഥാനമായി പ്രവർത്തിക്കുന്ന റോയൽ കരീബിയൻ ഗ്രൂപ്പിന് വേണ്ടി ഇത് രൂപീകരിച്ചത്.
1,198 അടി നീളത്തിൽ (365 മീറ്റർ) നിർമ്മിച്ച ഈ കപ്പൽ അഞ്ച് വർഷത്തെ ഗവേഷണങ്ങൾക്കും തയ്യാറെടുപ്പുകൾക്കുമൊടുവിലാണ് സജ്ജമായത്. കപ്പലിൽ 20 ഡെക്കുകളാണ് ഉള്ളത്. ഇതിൽ 18 എണ്ണവും അതിഥികൾക്ക് വേണ്ടിയുള്ളതാണ്. രണ്ടായിരത്തി മൂന്നൂറോളം തൊഴിലാളികളും ഈ കപ്പലിലുണ്ട്. സ്വിമ്മിംഗ് പൂളുകൾ കൂടാതെ വേൾപൂളുകളും ആറ് വാട്ടർസ്ലൈഡുകളും ഷിപ്പിലുണ്ട്. കൂടാതെ അതിഥികൾക്കായി ബാറുകൾ, ഫിറ്റ്നസ് സെന്ററുകൾ, സ്പാ കേന്ദ്രങ്ങൾ, മറ്റ് ഷോപ്പുകൾ, റെസ്റ്റോറന്റുകൾ, വിനോദകേന്ദ്രങ്ങൾ എന്നിവ സജ്ജമാക്കിയിട്ടുണ്ട്.
ഫ്യുവൽ സെൽ സാങ്കേതിക വിദ്യയോട് കൂടി എൽഎൻഎജി ഉപയോഗിച്ച് പ്രവർത്തിക്കുന്ന റോയൽ കരീബിയന്റെ ആദ്യ കപ്പലാണിത്. ഷിപ്പിനെ തീരവുമായി ബന്ധിപ്പിക്കുന്ന സംവിധാനവും ഹീറ്റ് റിക്കവറി സിസ്റ്റവുമെല്ലാം തീർത്തും വ്യത്യസ്തമായാണ് ക്രൂയിസിൽ അവതരിപ്പിച്ചിരിക്കുന്നത്. നിരവധി പരിസ്ഥിതി സൗഹൃദ സംവിധാനങ്ങളോട് കൂടിയാണ് ഷിപ്പിന്റെ നിർമാണം പൂർത്തീകരിച്ചിരിക്കുന്നത്. പതിനായിരത്തോളം സസ്യങ്ങളെ ഉൾപ്പെടുത്തിയ സെൻട്രൽ പാർക്ക് ഗാർഡനും കപ്പലിൽ അതിഥികൾക്കായി കാത്തിരിക്കുന്നുണ്ട്.
Comments