കീവ്: യുക്രെയ്നിൽ ഡ്രോൺ ആക്രമണങ്ങളിലൂടെ വ്യാപകനാശം വരുത്തുന്ന റഷ്യയ്ക്ക് കരുത്ത് നൽകുന്നത് ഇസ്രായേലിന്റെ അസാന്നിദ്ധ്യമെന്ന് സെലൻസ്കി. റഷ്യയെ തുടർച്ചയായി ഇറാൻ സഹായിക്കുകയാണ്. ഡ്രോണുകളും മിസൈലുകളും റോക്കറ്റുകളും നൽകുന്നു.
സെലൻസ്കി ആരോപിച്ചു. റഷ്യൻ മിസൈലുകളേയും ഡ്രോണുകളേയും തടയാൻ അതിർത്തികളിൽ ഇസ്രായേൽ മിസൈൽ പ്രതിരോധ കവചം അത്യാവശ്യമായിരി ക്കുന്നുവെന്നും എത്രയും പെട്ടന്ന് അത് നൽകണമെന്നും സെലൻസ്കി അഭ്യർത്ഥിച്ചു.
ഇറാന്റെ കരുത്ത് കുറയണമെങ്കിൽ ഇസ്രായേൽ തങ്ങളെ സഹായിച്ചാലേ മതിയാകൂ എന്നും സെലൻസ്കി ആവശ്യപ്പെട്ടു. പ്രത്യാക്രമണത്തിൽ ഒരു പരിധി വരെ റഷ്യയെ തളർത്താൻ ഞങ്ങൾക്ക് സാധിച്ചിരുന്നു.
പൊടുന്നനെയാണ് റഷ്യൻ ആക്രമണം കീവിനും ഖാർകീവിനും നേരെ നടന്നത്. ഇത് ഇറാൻ സഹായിച്ചതിനാൽ മാത്രമാണ്. ഫെബ്രുവരി മുതൽ ആക്രമിച്ചിരുന്ന റഷ്യ ഒരു തവണ പോലും ഡ്രോൺ ഉപയോഗിച്ചിരുന്നില്ല. പൊടുന്നനെ അവർക്ക് ഡ്രോണുകൾ എവിടെ നിന്ന് ലഭിച്ചുവെന്ന തന്ത്രപരമായ ചോദ്യവും സെലൻസ്കി നാറ്റോയോടും ഇസ്രായേലിനോടും ഉന്നയിച്ചു.
