ചെന്നൈ: താരദമ്പതികൾ തെറ്റുകാരല്ലെന്ന് സ്ഥിരീകരിച്ച് ആരോഗ്യവകുപ്പ്. നയൻതാരയും വിഘ്നേഷ് ശിവനും വാടക ഗർഭധാരണം വഴി കുഞ്ഞുങ്ങളെ സ്വീകരിച്ചത് നിയമപരമായ ചട്ടങ്ങൾ പാലിച്ചാണെന്നും താരദമ്പതികളുടെ ഭാഗത്ത് വീഴ്ചയില്ലെന്ന് ആരോഗ്യവകുപ്പ് പുറത്തുവിട്ട റിപ്പോർട്ടിൽ വ്യക്തമാക്കുന്നു.
വാടകഗർഭധാരണത്തിനുള്ള നിയമപരായ കാലയളവ് ദമ്പതികൾ പൂർത്തിയാക്കിയിരുന്നു. രേഖകൾ പ്രകാരം 2016ൽ ദമ്പതികൾ വിവാഹിതരായതാണ്. അതിനാൽ ഐസിഎംആർ ആവശ്യപ്പെടുന്ന മാർഗനിർദേശങ്ങൾ പാലിച്ചാണ് ദമ്പതികൾ വാടകഗർഭധാരണത്തിലേക്ക് നീങ്ങിയതെന്നാണ് റിപ്പോർട്ടിലെ പരാമർശം. ബുധനാഴ്ച വൈകിട്ടാണ് ആരോഗ്യവകുപ്പ് റിപ്പോർട്ട് പുറത്തുവിട്ടത്.
ഡയറക്ടറേറ്റ് ഓഫ് മെഡിക്കൽ സർവീസസ് ജോയിന്റ് ഡയറക്ടറുടെ നേതൃത്വത്തിലുള്ള സംഘമാണ് സംഭവത്തിൽ അന്വേഷണം നടത്തിയത്. മൂന്നംഗ സംഘത്തിന്റെ കണ്ടെത്തലിലാണ് താരദമ്പതികൾക്ക് വീഴ്ച സംഭവിച്ചിട്ടില്ലെന്ന് വ്യക്തമാക്കുന്നത്. വാടകഗർഭ ധാരണത്തിന് വേണ്ടി നടപടികൾ ആരംഭിക്കുന്നതിന് മുമ്പ് വിവാഹ രജിസ്ട്രേഷൻ സർട്ടിഫിക്കറ്റ് ദമ്പതികൾ ഹാജരാക്കിയിരുന്നുവെന്നും കണ്ടെത്തലുണ്ട്. കൂടാതെ സർട്ടിഫിക്കറ്റിന്റെ ആധികാരികത അന്വേഷണത്തിലൂടെ വ്യക്തമായതായും വാടകഗർഭ ധാരണത്തിനായി മുന്നോട്ട് വന്ന സ്ത്രീയും നിയമപ്രകാരമുള്ള ചട്ടങ്ങൾ പാലിച്ചിട്ടുണ്ടെന്നും ആരോഗ്യവകുപ്പ് അറിയിച്ചു.
