തീക്കൊള്ളി കൊണ്ട് തല ചൊറിയരുതെന്ന് പറയാറുണ്ട്. തീ കൊണ്ട് മുടി വെട്ടരുതെന്ന് ആരും പറഞ്ഞിട്ടില്ലാല്ലോ .അതുകൊണ്ട് തന്നെ തീ ഉപയോഗിച്ചു കൊണ്ടുള്ള മുടിവെട്ടൽ ട്രെൻഡിംഗായിരിക്കുകയാണ്. എന്നാൽ ഇപ്പോഴിതാ അത്തരത്തിൽ മുടി വെട്ടുന്നതിനിടെ ഒരു യുവാവിന് ഗുരുതരമായ പൊള്ളലേറ്റു എന്ന വാർത്തയാണ് പുറത്ത് വരുന്നത്. ഇതിന്റെ ദൃശ്യങ്ങളും സമൂഹമാദ്ധ്യമങ്ങളിൽ പ്രചരിക്കുന്നുണ്ട്..
ഗുജറാത്തിലെ വൽസാദ് ജില്ലയിലെ വാപി എന്ന സ്ഥലത്താണ് തീ ഉപയോഗിച്ച് മുടിവെട്ടിയതിനെ തുടർന്ന് പതിനെട്ടുകാരന് ഗുരുതരമായി പൊള്ളലേറ്റത്.കഴുത്തിലും നെഞ്ചിലും പൊള്ളലേറ്റ യുവാവിനെ ഉടൻ ആശുപത്രിയിൽ പ്രവേശിപ്പിച്ചു. പിന്നാലെ വിദഗ്ദ്ധ ചികിത്സയ്ക്കായി യുവാവിനെ വൽസാദിലെ സിവിൽ ആശുപത്രിയിലേക്ക് മാറ്റി.
തീ ഉപയോഗിച്ച് മുടി വെട്ടുന്നതിനായി കടയിലെ ജീവനക്കാരൻ തലയിൽ എന്തോ രാസവസ്തു ഉപയോഗിച്ചിരുന്നു. ഇതാണ് തീ ആളി പടരുന്നതിന് കാരണമാകുന്നത്. ഏത് രാസവസ്തുവാണ് ഉപയോഗിച്ചതെന്ന അന്വേഷണം നടക്കുകയാണെന്ന് പോലീസ് പറഞ്ഞു.
അതേസമയം പ്രചരിക്കുന്ന ദൃശ്യങ്ങളിൽ മുടിയിൽ തീ ഇടുന്നതിന് മുൻപ് സ്പ്രേ പോലുള്ള രാസവസ്തു ജീവനക്കാരൻ ഉപയോഗിക്കുന്നത് വ്യക്തമാണ്. ശേഷം തീ ഉപയോഗിച്ച് മുടി നീക്കം ചെയ്യാൻ ശ്രമിച്ചിട്ടും അതിന് സാധിക്കാതെ തീ ആളി പടരുകയായിരുന്നു. സമൂഹമാദ്ധ്യമങ്ങളിൽ പ്രചരിക്കുന്ന ഈ ദൃശ്യങ്ങൾക്കെതിരെ വ്യാപക പ്രതിഷേധമാണ് ഉയരുന്നത്. യുവാക്കളുടെ ജീവന് തന്നെ ഭീഷണിയാകുന്ന ഇത്തരം പ്രവർത്തനങ്ങൾ അവസാനിപ്പിക്കണം എന്നാണ് പലരും അഭിപ്രായപ്പെടുന്നത്.
