സിംബാബ്‌വെയ്‌ക്കെതിരായ മത്സരത്തിലെ പാകിസ്താന്റെ തോൽവിയോടെ ടി 20 ലോകകപ്പിൽ ടീമിന്റെ ഭാവി അനിശ്ചിതത്വത്തിലായിരിക്കുകയാണ്. പാക് ടീമിനെതിരെ ആരാധകരും മുൻ താരങ്ങളും രൂക്ഷ വിമർശനമാണ് ഉന്നയിക്കുന്നത്. അതിനിടെ മുൻ പാക് പേസർ ഷൊയ്ബ് അക്തർ പ്രതികരണവുമായി രംഗത്തെത്തി.
തന്റെ ഔദ്യോഗിക യൂട്യൂബ് ചാനലിലൂടെയാണ് അദ്ദേഹം പ്രതികരണം നടത്തിയത്. പാക് ടീമിനെയും ക്രിക്കറ്റ് ബോർഡിനെയും മുൻ താരം വിമർശിച്ചു. എന്നാൽ ഇന്ത്യൻ ക്രിക്കറ്റ് ടീമിനെ കുറിച്ചുളള പ്രതികരണമാണ് ഇപ്പോൾ ക്രിക്കറ്റ് പ്രേമികളുടെ വിമർശനത്തിന് കാരണമായത്. ഇന്ത്യ ഒരു മികച്ച ടീമല്ലെന്ന് അവകാശപ്പെട്ട അക്തർ, ടി20 ലോകകപ്പിൽ നിന്ന് ഒരാഴ്ചയ്‌ക്കുള്ളിൽ പുറത്താകുമെന്നും പ്രവചിച്ചു. പാകിസ്താന്റെ പാത ഇന്ത്യയും പിന്തുടരുമെന്നും ഓസ്‌ത്രേലിയയിൽ നിന്ന് ഉടൻ വിമാനം കയറുമെന്നാണ് അക്തറിന്റെ വിലയിരുത്തൽ.
ടി 20 ലോകകപ്പിൽ ഇന്ത്യയുടെ ഭാവിയെക്കുറിച്ചുളള അക്തറിന്റെ പ്രവചനത്തെക്കുറിച്ചുള്ള ആരാധകരുടെ പ്രതികരണം രൂക്ഷമായിരുന്നു. അക്തറിന്റെ അഭിപ്രായത്തോട് പ്രതികരിച്ചുകൊണ്ട് ഒരു ഇന്ത്യൻ ക്രിക്കറ്റ് ആരാധകൻ പറഞ്ഞു, ”ഷോയിബ് അക്തറിന് പാകിസ്താന്റെ തോൽവിയുടെ ഞെട്ടൽ താങ്ങാൻ കഴിയുന്നില്ല. ഇന്ത്യക്ക് ടി20 ലോകകപ്പ് നേടാനാകില്ലെന്നാണ് അദ്ദേഹം കരുതുന്നത്. ഇനിയുള്ള മത്സരങ്ങളിൽ മാത്രം ശ്രദ്ധ കേന്ദ്രീകരിക്കേണ്ടതുണ്ട്. ജയ് ഹോ ഇന്ത്യ’. കൗതുകകരമെന്നു പറയട്ടെ, നടന്നുകൊണ്ടിരിക്കുന്ന അഭിമാനകരമായ ടൂർണമെന്റിൽ ഇതുവരെയുള്ള ഏറ്റവും മികച്ച ലോകകപ്പ് കാമ്പെയ്ൻ ഇന്ത്യയ്‌ക്കായിരുന്നു, അരാധകൻ ട്വിറ്ററിൽ കുറിച്ചു.
പാകിസ്താൻ ആദ്യ മത്സരത്തിൽ ഇന്ത്യയോടും പരാജയം ഏറ്റുവാങ്ങിയിരുന്നു. രണ്ട് തോൽവികൾ ഏറ്റുവാങ്ങിയ പാക് ടീമിന്റെ സെമി സാധ്യത മങ്ങിയിരിക്കുകയാണ്. അടുത്ത മൂന്ന് മത്സരങ്ങൾ വൻ മാർജിനിൽ ജയിച്ചാലും മറ്റ് ടീമുകളുടെ പ്രകടനത്തെ
ആശ്രയിച്ചാകും പച്ചപ്പടയുടെ ഭാവി.
