എറണാകുളം: നിർബന്ധിപ്പിച്ച് അശ്ലീല വെബ് സീരീസിൽ അഭിനയിപ്പിച്ച സംഭവത്തിൽ ഹൈക്കോടതിയെ സമീപിച്ച് യുവ നടൻ. തിരുവനന്തപുരം സ്വദേശിയായ നടനാണ് ഒടിടി പ്ലാറ്റ്ഫോമിനെതിരെ കോടതിയെ സമീപിച്ചത്. വെബ് സീരീസിന്റെ സംപ്രേഷണം തടയണമെന്ന് ആവശ്യപ്പെട്ടാണ് നടൻ ഹർജി നൽകിയിരിക്കുന്നത്.
പരാതിയിൽ പോലീസ് കേസ് എടുത്തെങ്കിലും വെബ് സീരീസ് സംപ്രേഷണം ചെയ്യുന്നതിൽ പോലീസ് നടപടി സ്വീകരിച്ചിരുന്നില്ല. ഇത് മാത്രമല്ല സംഭവം വിവാദമായതോടെ വെബ് സീരീസിന്റെ ട്രെയിലർ ഉൾപ്പെടെ പുറത്തുവിടുകയും, പ്രഖ്യാപിച്ച തിയതിയിൽ സീരീസ് സംപ്രേഷണം ചെയ്യുകയും ചെയ്തിരുന്നു. ഇതോടെയാണ് ഒടിടി പ്ലാറ്റ്ഫോമായ യെസ്മയ്ക്കെതിരെ ഹൈക്കോടതിയിൽ ഹർജി നൽകിയത്.
വെബ് സീരീസ് പുറത്തിറങ്ങിയതോടെ ജീവിതം ദുസ്സഹമായെന്ന് ചൂണ്ടിക്കാട്ടിയാണ് ഹർജി നൽകിയിരിക്കുന്നത്. ദൃശ്യങ്ങൾ പിടിച്ചെടുക്കണം എന്നും ഹർജിയിൽ ആവശ്യപ്പെടുന്നു. തെറ്റിദ്ധരിപ്പിച്ചാണ് തന്നെ വെബ് സീരീസിൽ അഭിനയിപ്പിച്ചത്. സത്യാവസ്ഥ മനസ്സിലാക്കിയതോടെ അഭിനയത്തിൽ നിന്നും പിന്മാറാൻ ശ്രമിച്ചിരുന്നു. എന്നാൽ ഭീഷണിപ്പെടുത്തി തുടർന്നും അഭിനയിപ്പിക്കുകയായിരുന്നുവെന്നും ഹർജിയിൽ വ്യക്തമാക്കുന്നുണ്ട്.
