യുകെ പ്രധാനമന്ത്രിയായി അധികാരമേറ്റ ഇന്ത്യൻ വംശജൻ ഋഷി സുനകിന്റെ വീഡിയോ സമൂഹമാദ്ധ്യമങ്ങളിൽ വൈറലാകുന്നു. ഇന്ത്യയിലുള്ള ഒരാളുമായി വീഡിയോ കോളിൽ സംസാരിക്കുന്ന യുകെ പ്രധാനമന്ത്രിയുടെ വീഡിയോയാണ് ശ്രദ്ധ നേടുന്നത്. കശ്മീരിലെ സെലിബ്രിറ്റി ഷെഫായ സഞ്ജയ് റെയ്നയാണ് ഋഷി സുനകിനോടൊപ്പമുളള വീഡിയോ പങ്കുവെച്ചത്. സഞ്ജയ് റെയ്ന നാട്ടിലുള്ള അമ്മാവനെ വീഡിയോ കോൾ ചെയ്യുകയും ഋഷി സുനകിനെ കാണിച്ച് കൊടുക്കുകയും ചെയ്യുന്നത് വീഡിയോയിൽ കാണാം.
സുനകുമായുള്ള കൂടിക്കാഴ്ചയ്ക്ക് ശേഷമാണ് സഞ്ജയ് അമ്മാവനെ വീഡിയോ കോൾ ചെയ്തത്. അമ്മാവനുമായി സംസാരിക്കാൻ ഋഷി പുറകിൽ കാത്ത് നിൽക്കുന്നത് കാണാം.
കോൾ എടുത്ത അമ്മാവനോട് താൻ ഒരാളെ പരിചയപ്പെടുത്തി തരാമെന്ന് സഞ്ജയ് പറഞ്ഞു. പിന്നാലെ ഫോൺ ഋഷിക്ക് കൊടുത്തു. ഫോണിൽ സഞ്ജയുടെ അങ്കിളിനെ കണ്ടപാടെ ”വിജയ് മാമ ഹായ്” എന്നാണ് ഋഷി പറയുന്നത്. താൻ ഋഷിയാണെന്നും മാമന് സുഖമാണോയെന്നും അദ്ദേഹം ചോദിച്ചു. യുകെയിലേക്ക് വരണമെന്നും, എത്തിയാൽ മരുമകനോട് പറഞ്ഞ് നിർബന്ധമായും ഡൗൺസ്ട്രീറ്റിലേക്ക് വരണമെന്നും തന്നെ കാണണമെന്നും ഋഷി മാമനോട് പറയുന്നുണ്ട്. മാമയോട് സുഖമായിരിക്കാനും യുകെ പ്രധാനമന്ത്രി പറഞ്ഞു.
Visa on arrival ab pakka 😊😊#RishiSunak pic.twitter.com/imSIhuEgKB
— Sanjay Raina (@sanjayraina) October 27, 2022
ഋഷി സുനകിന്റെ വീഡിയോ ഇതിനോടകം തന്നെ സമൂഹമാദ്ധ്യമങ്ങളിൽ വൈറലായിക്കഴിഞ്ഞു. ബ്രിട്ടീഷ് പ്രധാനമന്ത്രി പദവിയിൽ ഇരിക്കുന്ന ഋഷി സുനകിന്റെ വിനീതമായ സ്വഭാവത്തെ പ്രശംസിച്ചുകൊണ്ട് നിരവധി പേരാണ് രംഗത്തെത്തിയിരിക്കുന്നത്.
