മകളെ കടിച്ച ഞണ്ടിനെ ജീവനോടെ കഴിച്ച അച്ഛന് കിട്ടിയത് എട്ടിന്റെ പണി. ചൈനയിലെ ഷിജിയാംഗിലാണ് സംഭവം. സ്വന്തം മകളെ കടിച്ച ഞണ്ടിനെ ജീവനോടെ കഴിച്ചാണ് ഇയാൾ പ്രതികാരം വീട്ടിയത്. എന്നാൽ ദിവസങ്ങൾക്കകം യുവാവിന്റെ നില ഗുരുതരമായി. 39 കാരനായ ലു ആണ് അണുബാധയെ തുടർന്ന് ആശുപത്രിയിൽ പ്രവേശിച്ചത്.
ഞണ്ടിനെ കഴിച്ച് രണ്ട് മാസത്തിനകം ഇയാൾക്ക് ദേഹാസ്വാസ്ഥ്യം അനുഭവപ്പെടുകയായിരുന്നു. ഇതോടെ യുവാവിനെ ആശുപത്രിയിൽ പ്രവേശിപ്പിച്ചു. തുടർന്ന് നടത്തിയ പരിശോധനയിൽ ഇയാൾക്ക് അണുബാധയേറ്റതായി കണ്ടെത്തി.
അടുത്തിടെ അസ്വാഭാവികമായ എന്തെങ്കിലും കഴിച്ചിരുന്നോയെന്ന് ഡോക്ടർമാർ ചോദിച്ചെങ്കിലും ലു ഒരക്ഷരം മിണ്ടിയില്ല. ഞണ്ടിനെ തിന്ന വിഷയം ഇയാളുടെ ഭാര്യയാണ് ഡോക്ടർമാരോട് വെളിപ്പെടുത്തിയത്. തുടർന്ന് ഡോക്ടർമാർ ചോദിച്ചപ്പോൾ മകളെ കടിച്ചതിന് ഞണ്ടിനോട് താൻ പ്രതികാരം ചെയ്തതാണെന്ന് ലു സമ്മതിച്ചു.
പരിശോധനയിൽ ഇയാളുടെ ശരീരത്തിൽ മൂന്ന് പാരസൈറ്റുകളുടെ സാന്നിദ്ധ്യം കണ്ടെത്തി. വിദഗ്ധ ചികിത്സയ്ക്ക് ശേഷം യുവാവ് ആശുപത്രിയിൽ നിന്ന് ഡിസ്ചാർജ് ആയി. ഇടയ്ക്കിടെ ആശുപത്രിയിലെത്തി ചെക്ക് അപ്പ് നടത്തണമെന്നും നിർദ്ദേശമുണ്ട്.
