369 അടി ഉയരത്തിൽ ധ്യാനരൂപത്തിലിരിക്കുന്ന പരമശിവൻ..
ലോകത്തിലെ ഏറ്റവും ഉയരമേറിയ ശിവപ്രതിമയായ സ്റ്റാച്യൂ ഓഫ് ബിലീഫ്..
വിശ്വാസത്തിന്റെ പ്രതിമയായ ‘വിശ്വാസ സ്വരൂപം’..
20 കിലോമീറ്റർ അകലെ നിന്ന് പോലും ദൃശ്യമാകുന്ന ഈ ശിവപ്രതിമയുടെ വിശേഷങ്ങളറിയാം..
നിരവധി എഞ്ചിനീയറിംഗ് അത്ഭുതങ്ങളാൽ നിർമാണകലയിൽ ലോകത്തെ പോലും അത്ഭുതപ്പെടുത്തിയിട്ടുണ്ട് ഭാരതം. ഇപ്പോഴിതാ.. വിസ്മയിപ്പിക്കുന്ന മറ്റൊരു നിർമ്മിതി കൂടി രാജ്യത്ത് തയ്യാറായിരിക്കുകയാണ്.. സ്റ്റാച്യൂ ഓഫ് ബിലീഫ് എന്ന ശിവപ്രതിമ..
രാജസ്ഥാനിൽ തയ്യാറായിരിക്കുന്ന ഈ നിർമ്മിതി ലോകത്തെ ഏറ്റവും ഉയരം കൂടിയ ശിവ പ്രതിമയും ലോകത്തിലെ ഏറ്റവും ഉയരമുള്ള നാലാമത്തെ പ്രതിമയുമാണ്.. രാജ്സമന്ദ് ജില്ലയിലെ നാഥ്ദ്വാര ടൗണിലാണ് 369 അടി ഉയരമുള്ള ശിവ പ്രതിമയായ ‘വിശ്വാസ സ്വരൂപം’ സജ്ജമായത്.
ഉദയ്പൂരിൽ നിന്ന് 45 കിലോമീറ്റർ അകലെ കുന്നിൻ മുകളിൽ സ്ഥിതിചെയ്യുന്ന ഈ പ്രതിമ നിർമ്മിച്ചിരിക്കുന്നത് തത്പദം സൻസ്ഥാനാണ്. ശ്രീനാഥ്ജി നഗരത്തിൽ സ്ഥാപിച്ചിരിക്കുന്ന ഈ നിർമിതി വിനോദസഞ്ചാര മേഖലയ്ക്കും മുതൽക്കൂട്ടാകുമെന്നാണ് വിലയിരുത്തൽ.
പരമശിവൻ ധ്യാന രൂപത്തിലിരിക്കുന്ന ഭാവത്തിലാണ് വിശ്വാസ സ്വരൂപത്തിന്റെ നിർമ്മാണം. ഒരു കാൽ മടക്കി അടുത്ത കാലിന് മുകളിൽ കയറ്റിവെച്ചിരിക്കുന്ന രൂപത്തിലാണ് ശിവ പ്രതിമയുള്ളത്. 20 കിലോമീറ്റർ അകലെ നിന്ന് പോലും ഇത് ദൃശ്യമാകുമെന്നതാണ് പ്രത്യേകത.
നിർമിതിക്ക് അകത്തും വിശാലമായ സൗകര്യങ്ങളുണ്ട്. ഉദ്യാനം, ഭക്ഷണശാല, എക്സിബഷൻ ഹാൾ, എന്നിവയെല്ലാം പ്രതിമയുടെ അകത്തും ചുറ്റുമായുമെല്ലാമുണ്ട്. വിശ്വാസ സ്വരൂപം കാണാൻ എത്തുന്നവർക്ക് നാല് ലിഫ്റ്റുകളും മൂന്ന് കോണിപ്പടികളും നിർമ്മിതിക്കുള്ളിൽ സജ്ജമാണ്. പ്രത്യേക തരം വിളക്കുകൾ ഉപയോഗിച്ച് പ്രകാശിപ്പിക്കുന്നതിനാൽ രാത്രിയിലും പ്രതിമ അതിമനോഹരമായി കാണാൻ സാധിക്കും.
2012 ഓഗസ്റ്റിലായിരുന്നു ശിവരൂപത്തിന്റെ നിർമാണത്തിനായി അടിത്തറ പാകിയത്. മൂവായിരം ടൺ സ്റ്റീലും ഇരുമ്പും, 2.5 ലക്ഷം ക്യൂബിക് ടൺ കോൺക്രീറ്റും മണലും ഉപയോഗിച്ച് പത്ത് വർഷമെടുത്ത് പ്രതിമയുടെ നിർമാണം പൂർത്തിയാക്കി. 250 കിലോമീറ്റർ വരെ വേഗതയുള്ള കാറ്റിനെ പ്രതിരോധിക്കാൻ കഴിയുമെന്നും ഈ ശിവപ്രതിമയ്ക്ക് വരുന്ന 250 വർഷത്തേക്ക് സുരക്ഷിതമായി നിലകൊള്ളുമെന്നും നിർമ്മാതാക്കൾ അവകാശപ്പെടുന്നു.
