മലയാള സിനിമയിലെ ന്യൂ ജനറേഷൻ എന്ന ആശയത്തിൽ അഭിപ്രായം പറഞ്ഞ് അടൂർ ഗോപാലകൃഷ്ണൻ. മലയാള സിനിമയിൽ ന്യൂ ജനറേഷൻ എന്നൊന്നില്ല എന്നാണ് അടൂർ പറഞ്ഞത്. കേന്ദ്ര സർക്കാർ സ്ഥാപനമായ ഇന്ത്യൻ ഇൻസ്റ്റിറ്റ്യൂട്ട് ഓഫ് മാസ് കമ്യൂണിക്കേഷന്റെ പാമ്പാടിയിലെ ദക്ഷിണമേഖലാ ക്യാമ്പസ് സംഘടിപ്പിച്ച ഗുരുവന്ദനം പരിപാടിയിൽ സംസാരിക്കുകയായിരുന്നു അദ്ദേഹം.
മലയാള സിനിമയിൽ ന്യൂ ജനറേഷൻ എന്നൊന്നില്ല. ചെറുപ്പക്കാരിൽ പലരുടേതും പഴഞ്ചൻ കാഴ്ചപ്പാടാണ്. പുതിയ ആശയങ്ങൾ അവതരിപ്പിക്കുകയാണ് ന്യൂ ജനറേഷൻ എങ്കിൽ താനും ന്യൂ ജനറേഷൻ ആണെന്ന് ഗുരുവന്ദനം പരിപാടിയിൽ അടൂർ പറഞ്ഞു.
പുതിയ ആശയങ്ങൾ അവതരിപ്പിക്കുന്നവരാണ് ന്യൂ ജനറേഷനെങ്കിൽ താൻ അതിൽപ്പെടുന്ന ആളാണ്. തലമുടി നരച്ചതുകൊണ്ട് ന്യൂ ജനറേഷൻ അല്ലാതാക്കരുത്. ചിന്തയിലാണ് നൂതനത്വം വേണ്ടത്, രൂപത്തിലല്ല എന്നും അടൂർ പറഞ്ഞു. ചടങ്ങിൽ ഇന്ത്യൻ ഇൻസ്റ്റിറ്റ്യൂട്ട് റീജണൽ ഡയറക്ടർ ഡോ.എസ് അനിൽകുമാർ അടൂരിനെ പൊന്നാടയണിയിച്ച് ആദരിച്ചു. അസി.പ്രൊഫ എ.ചന്ദ്രശേഖർ, ശരണ്യ നായർ എന്നിവരും പരിപാടിയിൽ സംസാരിച്ചു.
