പാകിസ്താനിൽ കളിക്കാനില്ലെന്ന ബിസിസിഐയുടെ നിലപാട് ഇമ്രാൻ ഖാനെതിരെ നടന്ന ആക്രമണത്തോടെ വീണ്ടും പ്രസക്തമാകുന്നു. അടുത്ത വർഷം നടക്കുന്ന ഏഷ്യാകപ്പ് പാകിസ്താനിലാണ് നിശ്ചയിച്ചിരിക്കുന്നത്. ഭീകരവാദവും രാഷ്ട്രീയ അസ്ഥിരതയും വാഴുന്ന പാകിസ്താനിൽ ഇന്ത്യൻ കളിക്കാരെ വിടുന്നത് സുരക്ഷിതമല്ലെന്നാണ് ബിസിസിഐയുടെ നിലപാട്. ഇക്കാര്യമാണ് ക്രിക്കറ്റ് കൺട്രോൾ ബോർഡ് സെക്രട്ടറി ജയ് ഷാ വ്യക്തമാക്കിയത്.
ഏഷ്യാ കപ്പിൽ പങ്കെടുത്തില്ലെങ്കിൽ അടുത്ത വർഷം ഇന്ത്യയിൽ നടക്കുന്ന ഏകദിന ലോകകപ്പ് ക്രിക്കറ്റ് ബഹിഷ്കരിക്കുമെന്നാണ് പാക് ക്രിക്കറ്റ് കൺട്രോൾ ബോർഡ് പ്രതികരിച്ചത്. പാകിസ്താന്റെ വെല്ലുവിളിയ്ക്ക് അർഹിക്കുന്ന മറുപടിയാണ് കേന്ദ്ര കായികമന്ത്രി അനുരാഗ് താക്കൂർ നൽകിയത്. അടുത്തവർഷം ഇന്ത്യയിൽ തന്നെ ലോകകപ്പ് നടക്കുമെന്നും എല്ലാ ടീമുകളും പങ്കെടുക്കുമെന്നും അദ്ദേഹം വ്യക്തമാക്കി.
ബിസിസിഐയുടെ നിലപാടിനെ രാജ്യത്തെ ജനങ്ങൾ പൊതുവെ സ്വാഗതം ചെയ്തുവെങ്കിലും ഇടതുപക്ഷക്കാരും ചില ലിബറലുകളും രംഗത്ത് വന്നിരുന്നു. ക്രിക്കറ്റിൽ രാഷ്ട്രീയം കലർത്തരുതെന്നായിരുന്നു ഇവരുടെ വാദം. ഇന്ത്യൻ കളിക്കാരുടെ സുരക്ഷ പണയം വച്ച് ഭീകരരാജ്യത്തിലേക്ക് കളിക്കാൻ വിടണമെന്നാണ് ഇക്കൂട്ടരുടെ വാദം. എന്നാൽ ആ വാദങ്ങളെ പൊളിക്കുന്ന വാർത്തകളാണ് പാകിസ്താനിൽ നിന്ന് ഒടുവിൽ പുറത്ത് വരുന്നത്.
മുൻ പാകിസ്താൻ ക്രിക്കറ്റ് ടീം ക്യാപ്റ്റനും മുൻ പ്രധാനമന്ത്രിയുമായ ഇമ്രാൻ ഖാന് വെടിയേറ്റതോടെ അവിടെ ആരും സുരക്ഷിതരല്ല എന്ന സന്ദേശമാണ് ലോകത്തിന് നൽകുന്നത്. ഈ സാഹചര്യത്തിൽ എങ്ങനെ ഇന്ത്യൻ കളിക്കാരെ അവിടേക്ക് അയക്കുമെന്ന ചോദ്യം ശ്രദ്ധേയമാണ്. മുമ്പ് പാക് പര്യടനത്തിനെത്തിയ ശ്രീലങ്കൻ കളിക്കാരുടെ ബസിന് നേരെ കറാച്ചിയിൽ ബോംബാക്രമണവും വെടിവയ്പ്പും നടന്നിരുന്നു. അന്ന് ഭാഗ്യം കൊണ്ടാണ് ശ്രീലങ്കൻ കളിക്കാർ ജീവനും കൊണ്ട് രക്ഷപ്പെട്ടത്.
ചൈന പോലും പാകിസ്താനിലെ ഭീകരാക്രമണം മൂലം പൊറുതി മുട്ടിയിരിക്കുകയാണ്. വിവിധ പദ്ധതികൾക്കായി എത്തിയ ചൈനീസ് തൊഴിലാളികളും എഞ്ചിനീയർമാരും പാകിസ്താനിൽ ഭീകരാക്രമണത്തിൽ കൊല്ലപ്പെട്ടത് ബീജിങിനെ സമർദ്ദത്തിലാക്കിയിരുന്നു. തങ്ങളുടെ പൗരന്മാരുടെ സുരക്ഷയിൽ ചൈന നിരന്തരം ആശങ്ക പ്രകടിപ്പിച്ചിട്ടും പാകിസ്താന് വേണ്ട രീതിയിൽ പ്രവർത്തിക്കാൻ കഴിഞ്ഞിട്ടില്ല. അതിന്റെ നീരസം ചൈന ഇടയ്ക്കിടെ പ്രകടിപ്പിക്കുന്നുണ്ട്. അത് കാരണം ചൈനയുടെ പാകിസ്താനിലെ നിരവധി പദ്ധതികൾ അനിശ്ചിതത്വത്തിലാണ്. ഇമ്രാൻ ഖാന് വെടിയേറ്റതോടെ പാക് ക്രിക്കറ്റിന്റെ ഭാവിയും അനിശ്ചിതത്വത്തിലായുണ്ട്. ഇനി വിദേശ ടീമുകൾ ഇന്ത്യയുടെ മാതൃക പിന്തുടർന്ന് പാക് മണ്ണിനെ ബഹിഷ്കരിക്കുമോയെന്ന് കണ്ടറിയാം.
