ഇഷ്ടമുള്ള വസ്ത്രത്തിൽ കറ പറ്റുന്നതിനെക്കാൾ വിഷമം വേറെ എന്തുണ്ട്?. ഒരിക്കലും ഇളകി പോകാത്ത കഠിനമായ കറകളാണ് വസ്ത്രത്തിൽ എങ്കിൽ പിന്നെ പറയുകയും വേണ്ട. സോപ്പുപൊടി ഉപയോഗിച്ച് കഴുകിയും ഉരച്ചുമെല്ലാം കറ കളയാൻ നാം ശ്രമിക്കും. എന്നാൽ വസ്ത്രം കേടുവരികയല്ലാതെ പ്രത്യേകിച്ച ഫലമൊന്നും ഉണ്ടാകാറില്ല. എന്നാൽ ചില പൊടിക്കൈകൾ കൊണ്ട് ഏത് കഠിനമായ കറയെയും നമുക്ക് എളുപ്പത്തിൽ ഇളക്കി കളയാം.
ഭൂരിഭാഗം ആളുകളുടെയും വസ്ത്രത്തിലും ചായയിൽ നിന്നും കാപ്പിയിൽ നിന്നുമുള്ള കറകളായിരിക്കും ഉണ്ടായിരിക്കുക. അതികഠിനമായ ഇവ കളയുക എന്നത് ഏറെ പ്രയാസകരാണ്. എന്നാൽ ഇത് നമുക്ക് എളുപ്പത്തിൽ വൃത്തിയാക്കി എടുക്കാം. ചായയോ കാപ്പിയോ വസ്ത്രത്തിൽ വീണാൽ ആ ഭാഗം ഉടൻ ചൂടുവെള്ളം ഉപയോഗിച്ച് മൃദുവായി കഴുകുക. വെള്ളം പിഴിഞ്ഞു കളഞ്ഞ ശേഷം പാത്രം കഴുകുന്ന ലായനി, വിനാഗിരി, വെള്ളം എന്നിവ സമം ചേർത്ത് പതുക്കെ തേച്ച് പിടിപ്പിക്കുക. ഇതിന് ശേഷം വസ്ത്രം കഴുകി എടുക്കാവുന്നതാണ്. മണ്ണിന്റെ കറ കളയാനും ഇതേ രീതി ഉപയോഗിക്കാം.
വിയർപ്പിന്റെ കറ നമുക്ക് എന്നും തലവേദനയാണ്. ഇത് നീക്കാനും ഉണ്ട് പൊടിക്കൈകൾ. മീറ്റ് ടെൻഡറൈസർ ഉപയോഗിച്ച് വിയർപ്പിന്റെ കറ കളയാം. വിയർപ്പായ വസ്ത്രത്തിന്റെ ഭാഗം നനച്ച ശേഷം മീറ്റ് ടെൻഡറൈസർ തേച്ച് പിടിപ്പിക്കുക. അൽപ്പ നേരം കഴിഞ്ഞ് വസ്ത്രം കഴുകാം.
പാത്രം കഴുകുന്ന ലായനിയും, ഹൈഡ്രജൻ പെറോക്സൈഡും കൊണ്ടുള്ള മിശ്രിതവും വിയർപ്പ് കറ കളയാൻ ഉപയോഗിക്കാം. വിയർപ്പായ ഭാഗത്ത് ഈ മിശ്രിതം അൽപ്പം ഒഴിച്ച ശേഷം ടൂത്ത് ബ്രഷ് ഉപയോഗിച്ച് ഉരസുക. ഇതിന് ശേഷം ഒരു മണിക്കൂർ നേരം വസ്ത്രം വയ്ക്കണം. പിന്നീട് കഴുകിയെടുക്കാം.
സൗന്ദര്യത്തിനും ആരോഗ്യത്തിനും മാത്രമല്ല വസ്ത്രത്തിലെ കറ കളയാനും മികച്ചതാണ് നാരങ്ങ. വിയർപ്പ് കറ കളയാൻ അൽപ്പം നാരങ്ങ നീരും വെള്ളവും ചേർത്ത് ഉപയോഗിക്കാം.
നമുക്ക് തലവേദനയാകുന്ന മറ്റൊന്നാണ് കെച്ചപ്പിന്റെ കറകൾ. ഈ കറ കളയാൻ വിനാഗിരി ഉപയോഗിക്കാം. കറയായ ഭാഗത്ത് വിനാഗിരി അൽപ്പം പുരട്ടുക. അൽപ്പനേരത്തിന് ശേഷം വസ്ത്രം കഴുകാം.
Comments