ഇരട്ടകുട്ടികളെ കണ്ടിട്ടില്ലേ? ഒരമ്മയുടെ ഗർഭപാത്രത്തിൽ ഒരുമിച്ച് വളർന്ന് മിനിറ്റുകളുടെ വ്യത്യാസത്തിൽ മാത്രം ഭൂമിയിൽ പിറവിയെടുത്ത കുഞ്ഞുങ്ങളെ? ഇത് അപൂർവ്വ കാര്യമൊന്നും അല്ല. ഒരേസമയം അഞ്ചുകുട്ടികൾ വരെ ഉണ്ടായ ദമ്പതിമാരുണ്ട്. ഇവരെല്ലാവരും ഒരേ ഗർഭപാത്രത്തിലാണ് ഉണ്ടാവുക. എന്നാൽ ഒരു സ്ത്രീ ശരീരത്തിൽ രണ്ട് ഗർഭപാത്രങ്ങളുണ്ടാകുന്നതും കുഞ്ഞുങ്ങളെ വഹിക്കുന്നതും അത്യപൂർവ്വമായ കാര്യമാണ്. അങ്ങനെ ഒന്നുണ്ടോ എന്നതാവും വലിയ സംശയം. ഇങ്ങനെ രണ്ട് ഗർഭപാത്രങ്ങളുള്ള അവസ്ഥയാണ് യൂട്രസ് ഡിഡെൽഫിസ്.ലോകത്ത് 30,000 ത്തിൽ ഒരാൾക്ക് മാത്രം വരുന്ന അവസ്ഥയാണിത്.
ഗർഭാശയവും സ്ത്രീശരീരത്തിലെ ജനനേന്ദ്രിയവും രണ്ട് വ്യത്യസ്ത ട്യൂബുകളിൽ നിന്നാണ് വികസിക്കുന്നത്. എന്നാൽ ചില സാഹചര്യങ്ങളിൽ ഇവ പൂർണ്ണമായി വികസിക്കാതെ വരുന്നു.ചില സന്ദർഭങ്ങളിൽ ട്യൂബുകളുടെ സംയോജനം ഗർഭായമുഖത്തിൽ സംഭവിക്കും. ഇത് പരാജയപ്പെടുകയാണെങ്കിൽ ഒരു സ്ത്രീക്ക് രണ്ട് ഗർഭാശയമുഖങ്ങളും രണ്ട് ജനനേന്ദ്രിയങ്ങളും ഉണ്ടാവാം. എന്നാലി ഇരട്ട ഗർഭപാത്രങ്ങൾക്ക് സാധാരണ ഗർഭപാത്രങ്ങളേക്കാൾ വലുപ്പം കുറവായിരിക്കും. ഇത് ചില സന്ദർഭങ്ങളിൽ അവസാന മാസങ്ങളിൽ കുഞ്ഞിന് വളരാൻ സ്ഥലമില്ലാതെ മാസം തികയാതെയുള്ള പ്രസവത്തിനും ഗർഭം അലസുന്നതിനും വഴി വെക്കും.
ഈ രണ്ട് ഗർഭപാത്രങ്ങളിലും കുഞ്ഞുങ്ങളെ വഹിക്കാൻ കഴിയുമോ എന്നത് സ്വാഭാവികമായി ഉയരുന്ന ചോദ്യമാണ്. ഏത് അണ്ഡാശയത്തിലാണോ അണ്ഡോൽപ്പാദനം നടക്കുന്നത് എന്നതിനെ ആശ്രയിച്ചിരിക്കും ഇത്.
ഒരേ സമയം രണ്ട് ഗർഭപാത്രത്തിലും കുഞ്ഞുങ്ങളെ വഹിച്ച് ജന്മം നൽകിയ സന്ദർഭങ്ങളും ലോകത്ത് ഉണ്ടായിട്ടുണ്ട്.ലണ്ടൻ സ്വദേശി ജെന്നിഫർ ആഷ്വുഡാണ് രണ്ട് ഗർഭപാത്രത്തിലൂടെ രണ്ട് കുഞ്ഞുങ്ങൾക്ക് ജന്മം നൽകിയത്. ആദ്യത്തെ കുഞ്ഞിന് ജന്മം നൽകിയപ്പോൾ യുവതി തനിക്ക് രണ്ട് ഗർഭപാത്രങ്ങൾ ഉള്ള വിവരം അറിഞ്ഞിരുന്നില്ല. രണ്ടാമതും ഗർഭിണിയായപ്പോഴാണ് രണ്ട് ഗർഭപാത്രമുണ്ടെന്നും ഓരോന്നിലും ഓരോ ജീവൻ തുടിക്കുന്നുണ്ടെന്നും തിരിച്ചറിഞ്ഞത്.
