സുരേഷ് ഗോപിയുടെ തിരച്ചു വരവ് ആരാധകരും സിനിമാ പ്രേമികളും ആഘോഷമാക്കിയിരുന്നു. നീണ്ട ഇടവേളയ്‌ക്ക് ശേഷം വരനെ ആവശ്യമുണ്ട് എന്ന ചിത്രത്തിലൂടെ തിരിച്ചു വരവ് നടത്തിയ താരത്തിന്റെ സിനിമകളെല്ലാം വലിയ വിജയമായിരുന്നു. വരനെ ആവശ്യമുണ്ട്, കാവൽ, പാപ്പൻ, മേ ഹൂം മൂസ എന്നിവയെല്ലാം സിനിമാ പ്രേമികൾ ഇരു കൈയ്യും നീട്ടി സ്വീകരിച്ചു. ആരാധകർക്ക് ആവേശമേകുന്ന ഒരുപിടി ചിത്രങ്ങളുടെ പ്രഖ്യാപനങ്ങളും താരം നടത്തി. ഇപ്പോഴിതാ തന്റെ പുതിയ ചിത്രം ആരംഭിച്ചു എന്ന് അറിയിച്ചിരിക്കുകയാണ് സുരേഷ് ഗോപി. ‘ജെഎസ്‍കെ’ എന്ന് പേരിട്ടിരിക്കുന്ന സിനിമ സംവിധാനം ചെയ്യുന്നത് നവാഗതനായ പ്രവീൺ നാരായണനാണ്.
പൂജ ചടങ്ങുകളോടെ ‘ജെഎസ്‍കെ’യുടെ ഷൂട്ടിംഗിന് തുടക്കം കുറിച്ചു. “സത്യം എപ്പോഴും ജയിക്കും” എന്ന ടാഗ് ലൈനോടെയാണ് ചിത്രത്തിന്റെ പോസ്റ്റർ അണിയറ പ്രവർത്തകർ പുറത്തു വിട്ടിരിക്കുന്നത്. തന്റെ 255-ാം ചിത്രമായ ‘ജെഎസ്‍കെ’-യിൽ വക്കീല്‍ കഥാപാത്രമായിട്ടാണ് സുരേഷ് ഗോപി എത്തുക എന്നാണ് റിപ്പോർട്ടുകൾ. കോസ്‌മോസ് എന്റർടെയ്ൻമെന്റ്സ് നിർമ്മിക്കുന്ന ചിത്രത്തിൽ സുരേഷ് ഗോപിയുടെ മകൻ മാധവ് സുരേഷും അഭിനയിക്കുന്നു.
സിനിമയിൽ തുടക്കം കുറിക്കുന്ന മാധവ് കഴിഞ്ഞ ദിവസം മമ്മൂട്ടിയുടെ വീട്ടിലെത്തി അനുഗ്രഹം തേടിയിരുന്നു. രെണദിവ് ആണ് ചത്രത്തിന്റെ ഛായാഗ്രാഹണം നിര്‍വ്വഹിക്കുന്നത്. അനുപമ പരമേശ്വരൻ, ശ്രുതി രാമചന്ദ്രൻ, അസ്‍കര്‍ അലി, മുരളി ഗോപി എന്നിവരും ചിത്രത്തില്‍ പ്രധാന വേഷങ്ങൾ ചെയ്യുന്നു. മാത്യൂസ് തോമസ് സംവിധാനം ചെയ്യുന്ന ഒറ്റക്കൊമ്പൻ, രാഹുൽ രാമചന്ദ്രൻ സംവിധാനം ചെയ്യുന്ന SG251, ജയരാജ് സംവിധാനം ചെയ്യുന്ന ഹൈവെ2 എന്നിവയാണ് സുരേഷ് ഗോപിയുടെ വരാനിരിക്കുന്ന മറ്റ് ചിത്രങ്ങൾ.
