അഹമ്മദാബാദ്: ഭാരതത്തെ ഒന്നിപ്പിക്കാനുള്ള രാഹുൽ ഗാന്ധിയുടെ ഭാരത് ജോഡോ യാത്ര പുരോഗമിക്കുന്നതിനിടെ ഗുജറാത്ത് കോൺഗ്രസിൽ വീണ്ടും രാജി. മുതിർന്ന നേതാവും എംഎൽഎയുമായ ഭഗവാൻ ബരദ് കോൺഗ്രസ് വിട്ടു. പാർട്ടി അംഗത്വവും എംഎൽഎ സ്ഥാനവും രാജിവെച്ച അദ്ദേഹം ബിജെപിയിൽ ചേരുമെന്നാണ് സൂചന.
പാർട്ടിയുമായുള്ള അസ്വാരസ്യത്തെ തുടർന്നാണ് ബരദ് കോൺഗ്രസ് വിടുന്നതെന്നാണ് റിപ്പോർട്ടുകൾ. രാജിവയ്‌ക്കുന്നതായി അറിയിച്ചുകൊണ്ടുള്ള കത്ത് അദ്ദേഹം ഗുജറാത്ത് കോൺഗ്രസ് അദ്ധ്യക്ഷൻ ജഗദിഷ് താക്കൂർ, സ്പീക്കർ നിമാബെൻ ആചാര്യ എന്നിവർക്ക് കൈമാറി. തന്നെ പിന്തുണയ്‌ക്കുന്നവരുമായി കൂടിയാലോചിച്ച ശേഷമാണ് അദ്ദേഹം കോൺഗ്രസ് വിട്ടത്. ഗിർ സോമനാഥ് ജില്ലയിലെ തലാല മണ്ഡലത്തിലെ എംഎൽയാണ് ബരദ്.
ഇന്നലെ കോൺഗ്രസിന്റെ പ്രബല നേതാക്കളിൽ ഒരാളായ മോഹൻസിൻഹ് രത്വ രാജിവെച്ച് ബിജെപിയിൽ ചേർന്നിരുന്നു. ഇതിന് പിന്നാലെയാണ് മുതിർന്ന നേതാക്കളിൽ ഒരാൾ കൂടി പാർട്ടി വിട്ടത്. അടുത്ത മാസമാണ് ഗുജറാത്തിൽ നിയമസഭാ തിരഞ്ഞെടുപ്പ്. ഇതിനിടെ മുതിർന്ന നേതാക്കളുടെ കൊഴിഞ്ഞുപോക്ക് കോൺഗ്രസിന് വലിയ തിരിച്ചടിയായിരിക്കുകയാണ്.
