എറണാകുളം: ഈ വർഷത്തെ ഐപിഎൽ താരലേലം കേരളത്തിൽ. അടുത്ത മാസം ഐപിഎൽ താരലേലം കൊച്ചിയിലാകും നടക്കുക. ആദ്യമായാണ് കേരളത്തിൽ താരലേലം നടക്കുന്നത്.
ഡിസംബർ 23 നാണ് ലേലം നടക്കുന്നത്. ഐപിഎൽ മിനി ലേലമാണ് 23 ന് നടക്കുക. നേരത്തെ ഐപിഎൽ താരലേലം ബംഗളൂരുവിലായിരിക്കുമെന്ന തരത്തിൽ വാർത്തകൾ പുറത്തുവന്നിരുന്നു. ഇതിന് പിന്നാലെ തുർക്കിയിലെ ഇസ്താംബൂൾ ഉൾപ്പെടെ പരിഗണിക്കുന്നതായുള്ള റിപ്പോർട്ടും ഉണ്ടായിരുന്നു. എന്നാൽ അപ്രതീക്ഷിതമായി ലേലം കേരളത്തിൽവെച്ച് നടത്താനുള്ള തീരുമാനം ക്രിക്കറ്റ് ആരാധകരെ ആവേശം കൊള്ളിച്ചിട്ടുണ്ട്. ലേലത്തിനായി അധികൃതർ അടുത്ത മാസം കൊച്ചിയിൽ എത്തും.
കഴിഞ്ഞ വർഷം ഒരു ടീമിന് പരമാവധി 90 കോടി രൂപയാണ് ചിലവാക്കാൻ അനുമതി നൽകിയിരുന്നത്. എന്നാൽ ഇക്കുറി ഇത് വർദ്ധിപ്പിച്ചിട്ടുണ്ട്. ഒരു ടീമിനായി ഇക്കുറി പരമാവധി 95 കോടി രൂപ ചിലവഴിക്കാം. മാർച്ച് അവസാനത്തോടെ ഐപിഎൽ മത്സരങ്ങൾക്ക് തുടക്കമാകുമെന്നാണ് റിപ്പോർട്ടുകൾ.
