മലപ്പുറം: ജില്ലയിൽ ലോകകപ്പ് വരവേൽക്കാൻ ഒരുങ്ങി കെ എസ് ഇ ബി. ഇതിന്റെ ഭാഗമായി വൈദ്യുതി മുടക്കമില്ലാതെ ഫുട്ബോൾ കാണാൻ ആരാധകർക്ക് അവസരമൊരുക്കും. ഈ മാസം 20 ന് ലോകകപ്പ് തുടങ്ങാനിരിക്കെയാണ് കെഎസ്ഇബി ഫുട്ബോൾ ആരാധകർക്ക് ആവേശം പകർന്ന് രംഗത്തെത്തിയത്.
കാളികാവ് സെക്ഷന് കീഴിൽ മൂന്ന് ഗ്രൂപ്പുകളായി തിരിഞ്ഞ് യുദ്ധകാലടിസ്ഥാനത്തിലാണ് നവീകരണ പ്രവൃത്തികൾ ഉദ്യോഗസ്ഥർ നടത്തുന്നത്. രണ്ട് ഗ്രൂപ്പുകൾ മരച്ചില്ലകൾ വെട്ടിമാറ്റി ലെനുകളുടെ കാര്യക്ഷമത ഉറപ്പാക്കും. മൂന്നാമത്തെ ഗ്രൂപ്പ് അലൂമിനിയം ലൈനുകൾ മാറ്റി എബിസി ഫൈബർ കേബിളുകൾ സ്ഥാപിക്കും. സാധാരണ ഗതിയിൽ ലോകകപ്പ് സീസണുകളിലും കടുത്ത വിമർശനത്തിനും കൈയേറ്റത്തിനും ജീവനക്കാർ ഇരയാകാറുണ്ട്. ഇതിന് പരിഹാരം കാണാനാണ് പുതിയ നടപടി.
ആരാധകരുടെ ഫുട്ബോൾ ആവേശം ചോരാതിരിക്കാനുള്ള ശ്രമങ്ങളാണ് നടത്തുന്നത്. ജനങ്ങൾക്ക് മുടക്കമില്ലാതെ വൈദ്യുതി ലഭിക്കാനുള്ള ശ്രമങ്ങൾ എല്ലാം നടത്തുന്നുണ്ടെന്ന് അസി.എൻജിനീയർ ബിജു പറഞ്ഞു.
