ലണ്ടൻ: പുത്തൻ മാറ്റങ്ങളുമായി ബ്രിട്ടീഷ് എയർവേയ്സ്. പുരുഷ പൈലറ്റുമാരെയും കാബിൻ ക്രൂവിലെ പുരുഷ അംഗങ്ങളെയും മേക്കപ്പും ആഭരണങ്ങളും അണിയാൻ അനുവദിച്ച് ജൻഡർ ന്യൂട്രലാവുകയാണ് ബ്രിട്ടീഷ് എയർവേയ്സ്.
യൂണിഫോമിലുള്ള എല്ലാ ജീവനക്കാർക്കും അടുത്ത തിങ്കളാഴ്ച മുതൽ കൺമഷി,ഐലാഷസ്,കമ്മൽഎന്നിവ അണിയാമെന്നും നഖം പോളിഷ് ചെയ്യാനും ,ഹാൻഡ് ബാഗ് ഉപയോഗിക്കാനും മാൻ ബൺ ചെയ്യാനും അനുവദിക്കുമെന്നും വിമാനകമ്പനി പുറത്തിറക്കിയ നോട്ടീസിൽ വ്യക്തമാക്കുന്നു. ബോൾഡായിരിക്കുക,അഭിമാനത്തോടെ നിങ്ങളായിരിക്കുക എന്ന് നോട്ടീസിൽ കമ്പനി നിർദ്ദേശിക്കുന്നു.
ജീവനക്കാർക്കായി പുറത്തിറക്കിയ മാർഗ നിർദ്ദേശങ്ങൾ ലിംഗം,വംശം,സാമൂഹിക പശ്ചാത്തലം,സംസ്കാരം, എന്നീ വേർതിരിവുകൾ ഇല്ലാതെ എല്ലാവരും സ്വീകരിക്കുമെന്ന് പ്രതീക്ഷിക്കുന്നതായും നോട്ടീസിലുണ്ട്. മേക്കപ്പ് ചെയ്യുമ്പോൾ തിരിച്ചറിയാനാവാത്ത വിധത്തിൽ മുഖം മാറ്റരുതെന്ന് പ്രത്യേകം നിർദ്ദേശിച്ചിട്ടുണ്ട്.
ബ്രിട്ടീഷ് എയർവേയ്സിലെ എല്ലാ സഹപ്രവർത്തകരെയും കുറിച്ച് ഞങ്ങൾ അഭിമാനിക്കുന്നു, എല്ലാവരേയും ഉൾക്കൊള്ളുന്ന ഒരു തൊഴിൽ അന്തരീക്ഷം സൃഷ്ടിക്കാൻ കമ്പനി പ്രതിജ്ഞാബദ്ധരാണ്.ഇതിനായി പുതുക്കിയ മാർഗ്ഗനിർദ്ദേശങ്ങൾ സൃഷ്ടിക്കാൻ കമ്പനി പരമാവധി പ്രവർത്തിച്ചിട്ടുണ്ട്.സഹപ്രവർത്തകരെ മികച്ച വ്യക്തികളാക്കാൻ ആഗ്രഹിക്കുന്നുവെന്ന് കമ്പനി വ്യക്തമാക്കി.
