മലപ്പുറം: ഐ ലീഗ് സീസണിൽ ഗോകുലം കേരള എഫ്സിക്ക് വിജയത്തുടക്കം. മഞ്ചേരി പയ്യനാട് സ്റ്റേഡിയത്തിൽ നടന്ന മത്സരത്തിൽ മുഹമ്മദൻ സ്പോർട്ടിംഗ് ക്ലബ്ബിനെ എതിരില്ലാത്ത ഒരു ഗോളിനാണ് ഗോകുലം കേരള പരാജയപ്പെടുത്തിയത്. കാമറൂൺ താരം അഗസ്റ്റൻ ജൂനിയറാണ് ഗോകുലത്തിന്റെ ഗോൾ സ്കോറർ. 55ആം മിനിറ്റിലായിരുന്നു മത്സരത്തിന്റെ ഗതി നിർണയിച്ച മനോഹരമായ ഗോൾ പിറന്നത്.
തുടർച്ചയായി രണ്ട് കിരീടങ്ങൾ നേടിയ ഗോകുലം, ഹാട്രിക് കിരീടം ലക്ഷ്യമിട്ടാണ് പുതിയ സീസണിൽ ബൂട്ട് കെട്ടുന്നത്. 18ന് നടക്കുന്ന എവെ മത്സരത്തിൽ ഐസ്വാൾ എഫ്സിയാണ് ഗോകുലത്തിന്റെ എതിരാളികൾ.
