‘പത്ത് ദിവസം കൊണ്ട് ബെൾത്തിട്ട് പാറണ്ടേ ങ്ങക്ക്” കുറച്ച് ദിവസങ്ങളായി സോഷ്യൽ മീഡിയയിൽ വൈറലായിക്കൊണ്ടിരിക്കുന്ന ഫേസ്ക്രീം പരസ്യത്തിലെ വാക്കുകളാണിത്. ഒൻപത് ദിവസം കൊണ്ട് ബ്രിട്ടീഷുകാരെപ്പോലെ വെളുക്കാം, ചുണ്ടൊക്കെ നല്ലോണം ചുവപ്പിക്കാം… എന്നൊക്കെയാണ് നിർമ്മാതാക്കളുടെ അവകാശവാദങ്ങൾ. ബ്രീട്ടീഷ് വൈറ്റനിംഗ് ക്രീം എന്നാണ് കാസർകോട് നിർമ്മിക്കുന്ന ഈ ക്രീമിന്റെ പേര്.
ഇൻസ്റ്റഗ്രാം പോലുള്ള സോഷ്യൽ മീഡിയാ പ്ലാറ്റ്ഫോമുകളിലൂടെയാണ് യുവാക്കളുടെ വമ്പൻ പ്രചാരണം നടക്കുന്നത്. ഇന്ത്യ, ഖത്തർ, ബഹറിൽ, യുഎഇ എന്നീ രാജ്യങ്ങളിലുള്ളവർ ഓർഡർ ചെയ്താൽ സാധനം ഫ്രീയായി വീട്ടിലെത്തിക്കും. ഫേസ് ക്രീം ഓർഡർ ചെയ്യാനുള്ള വാട്സ്ആപ്പ് നമ്പറും കൊടുത്തിട്ടുണ്ട്.
ഇതൊക്കെ വിശ്വസിച്ച് ബ്യൂട്ടി പ്രൊഡക്ടുകൾ വാങ്ങാൻ ഇന്നും ആളുകളുണ്ടോ എന്നാണ് ചിന്തിക്കുന്നതെങ്കിൽ, സംശയിക്കണ്ട് ആ പരസ്യത്തിന്റെ കമന്റ് ബോക്സ് ഒന്ന് പോയി നോക്കിയാൽ മനസിലാവും. എന്തായാലും ഈ ക്രീം ഉപയോഗിച്ച് ആർക്കെങ്കിലും രോഗങ്ങൾ ബാധിച്ചിട്ടുണ്ടോ എന്നത് സംബന്ധിച്ച് ഇതുവരെ വിവരങ്ങൾ ലഭിച്ചിട്ടില്ല. ക്രീമിന്റെ അനന്തര ഫലങ്ങളെക്കുറിച്ചും വ്യക്തമായ അറിവില്ല.
സാധാരണയായി പെട്ടെന്ന് വെളുക്കാൻ വേണ്ടി ഇത്തരം ക്രീമുകളിൽ എന്താണ് ഉപയോഗിക്കുന്നത് എന്ന് ചിന്തിച്ച് നോക്കിയിട്ടുണ്ടോ ? സ്റ്റിറോയ്ഡ് പോലുള്ള രാസവസ്തുക്കളാണ് ഈ ക്രീമുകൾ നിർമ്മിക്കാൻ ഉപയോഗിക്കുന്നത്. വെള്ളപ്പാണ്ടിന്റെ ചികിത്സയ്ക്ക് ഉപയോഗിക്കുന്ന മരുന്നുകളും ഇതിൽ ചേർക്കുന്നുണ്ട്.
സ്റ്റിറോയ്ഡുകൾക്ക് സൈഡ് ഇഫക്ടുകൾ ഏറെയാണ്. അധികമായി ഉപയോഗിച്ചാൽ കണ്ണിന്റെ കാഴ്ചശക്തി നഷ്ടപ്പെടാൻ വരെ സാധ്യതയുണ്ട്. ഇത് കൂടാതെ മുഖം ചുവന്ന് തുടുക്കുകയും എരിച്ചിൽ അനുഭവപ്പെടുകയും ചെയ്യുന്നു. തുടർച്ചയായി ഉപയോഗിക്കുന്നതോടെ ശരീരത്തിൽ ചൊറിച്ചിലും സ്ട്രെച്ച് മാർക്കുകൾ ഉണ്ടാകുവാനും സാധ്യതയുണ്ട്. ഇത് തേച്ച് വെയിലത്തിറങ്ങിയാൽ മുഖം ചുവക്കുകയും ചർമ്മത്തിൽ കറുത്ത പാടുകൾ പ്രത്യക്ഷപ്പെടുതയും ചെയ്യുന്നു.
ക്രീം തുടർച്ചയായി ഉപയോഗിക്കുന്നതോടെ ശരീരത്തിൽ ചൊറിച്ചിലും സ്ട്രെച്ച് മാർക്കുകൾ ഉണ്ടാകുവാനും സാധ്യതയുണ്ട്. ഇത്തരം ക്രീമുകൾ ഉപയോഗിക്കുന്നത് പെട്ടെന്നതിന്റെ ഉപയോഗം നിർത്തിയാൽ ചർമ്മകാന്തി നഷ്ടപ്പെടുമെന്നും ആരോഗ്യ വിദഗ്ധർ മുന്നറിയിപ്പ് നൽകുന്നുണ്ട്. സോഷ്യൽ മീഡിയ വഴി വിൽക്കുന്ന ഈ ഉത്പന്നങ്ങൾ കാരണം ആളുകൾക്ക് ത്വക്ക് രോഗങ്ങൾ വരെ ബാധിക്കുന്നുണ്ടെന്ന പരാതികളാണ് ലഭിക്കുന്നത്. ഇത്തരം സൗന്ദര്യവർദ്ധക വസ്തുക്കൾ ക്യാൻസറിന് വരെ കാരണമാകുന്നുണ്ടെന്നാണ് പഠനം.
വെളുപ്പിലാണ് സൗന്ദര്യമിരിക്കുന്നത് എന്ന് ഇന്നും സമൂഹത്തലെ ഒരു വിഭാഗം ആളുകൾ വിശ്വസിക്കുന്നു എന്നതിന്റെ തെളിവ് കൂടിയാണ് ഈ പരസ്യങ്ങൾക്ക് ഇത്രയധികം പ്രചാരണം നേടിക്കൊടുക്കുന്നത്. ആളുകളുടെ മനസിൽ നിന്ന് ഇത്തരം ചിന്തകൾ തുടച്ചുനീക്കാൻ വേണ്ടി പ്രൊഡക്ടുകളുടെ പേര് വരെ മാറ്റുന്നതിനിടെയാണ് സമൂഹത്തെ പിന്നോട്ട് വലിക്കുന്ന യാഥാസ്ഥിതികൾ ചിന്തകളുമായി പരസ്യ പ്രചാരണങ്ങൾ നടത്തുന്നത് എന്നതും ശ്രദ്ധേയമാണ്.
