തിരുവനന്തപുരം: എംപി ജെബി മേത്തറിനെതിരെ മാനനഷ്ടത്തിന് പരാതി നൽകി തിരുവനന്തപുരം മേയർ ആര്യാ രാജേന്ദ്രൻ. കത്ത് വിവാദത്തിൽ ആര്യയ്ക്കെതിരെ നടത്തിയ പരാമർശത്തിലാണ് ജെബി മേത്തർക്കെതിരെ പരാതി നൽകിയിരിക്കുന്നത്. പരാമർശം പിൻവലിച്ച് മാപ്പ് പറയണമെന്നാണ് പരാതിയിലെ ആവശ്യം.
കത്ത് വിവാദത്തിൽ നഗരസഭയിൽ കോൺഗ്രസ് നടത്തിയ പ്രതിഷേധ പ്രകടനത്തിനായി ‘ കട്ട പണവുമായി മേയറുകുട്ടി കോഴിക്കോട്ടേയ്ക്ക് വിട്ടോ’ എന്നെഴുതിയ പോസ്റ്റർ പതിപ്പിച്ച പെട്ടിയുമായാണ് ജെബി മേത്തർ എത്തിയത്. ഇത് വലിയ ശ്രദ്ധ പിടിച്ചു പറ്റുകയും, മദ്ധ്യമങ്ങളിൽ വലിയ വാർത്തയാകുകയും ചെയ്തിരുന്നു. ഇതിലാണ് മേയർ പരാതി നൽകിയത്. നോട്ടീസ് ലഭിച്ച് ഏഴ് ദിവസത്തിനകം രേഖാമൂലവും, മാദ്ധ്യമങ്ങളിലൂടെയും മാപ്പ് പറയണം എന്നാണ് ആവശ്യം. അല്ലാത്ത പക്ഷം നിയമനടപടി സ്വീകരിക്കുമെന്നും പരാതിയിൽ മുന്നറിയിപ്പുണ്ട്. ജെബി മേത്തറുടെ പോസ്റ്റർ ചർച്ചയായതിന് പിന്നാലെ നിയമ നടപടി സ്വീകരിക്കുമെന്ന് മേയർ വ്യക്തമാക്കിയിരുന്നു.
ആര്യ രാജേന്ദ്രന്റെ ഭർത്താവ് സച്ചിൻ ദേവ് എംഎൽഎ കോഴിക്കോട് സ്വദേശിയാണ്. ഇത് ഉദ്ദേശിച്ചാണ് എംപി പോസ്റ്റർ തയ്യാറാക്കിയത് എന്നായിരുന്നു ഉയർന്ന പ്രധാന വിമർശനം. ഇതിന് പിന്നാലെ താൻ അതുദ്ദേശിച്ചല്ല പോസ്റ്റർ കൊണ്ടുവന്നതെന്ന് ജെബി മേത്തർ വിശദീകരിച്ചിരുന്നു.
Comments