പാരീസ്: 2024 പാരീസ് ഒളിംപിക്സിന്റെയും പാരാലിമ്പിക്സിന്റെയും ഭാഗ്യചിഹ്നം സംഘാടകർ പുറത്തിറക്കി. ചുവന്ന ഫ്രിജിയൻ തൊപ്പിയാണ് ചിഹ്നം. പേർഷ്യൻ, ബാൾക്കൻ രാജ്യങ്ങൾ, തുർക്കി എന്നിവിടങ്ങളിലുള്ളവർ ധരിക്കുന്ന തൊപ്പിയോട് സാമ്യമുള്ളതാണ് പാരീസ് ഒളിംപിക്സിന്റെ ഭാഗ്യചിഹ്നമായി തിരഞ്ഞെടുക്കപ്പെട്ടിരിക്കുന്ന ഫ്രിജിയൻ തൊപ്പി.
ഫ്രഞ്ച് വിപ്ലവത്തിന്റെ ആശയങ്ങളിൽ ഒന്നായ വിമോചനത്തിന്റെ ചിഹ്നമായി ധരിക്കപ്പെടുന്നതാണ് ചുവന്ന ഫ്രിജിയൻ തൊപ്പി. ത്രികോണാകൃതിയിൽ ത്രിവർണ്ണ റിബണും വലിയ ബഹുവർണ ചെരുപ്പുകളും അണിഞ്ഞ് പുഞ്ചിരിക്കുന്ന മുഖത്തോടെ നിൽക്കുന്ന തരത്തിലുള്ളവയാണ് ഒളിംപിക്സ്- പാരാലിമ്പിക്സ് ഭാഗ്യചിഹ്നങ്ങളായി അവതരിപ്പിച്ചിരിക്കുന്ന ഫ്രിജിയൻ തൊപ്പികൾ. പാരാലിമ്പിക്സ് ചിഹ്നമായ തൊപ്പിയുടെ ഒരു കാൽ കൃത്രിമക്കാലാണ്.
സ്വാതന്ത്ര്യത്തിന്റെ പ്രതീകമായാണ് ഫ്രിജിയൻ തൊപ്പി ഒളിംപിക്സ് ഭാഗ്യചിഹ്നമായി തിരഞ്ഞെടുത്തിരിക്കുന്നതെന്ന് സംഘാടകർ വിശദീകരിച്ചു. ആധുനിക ഫ്രാൻസിനെയും പുരാതന ലോകത്തെയും തമ്മിൽ ബന്ധിപ്പിക്കുന്നതാണ് ഈ ചിഹ്നമെന്നും സംഘാടകർ വ്യക്തമാക്കി.
