മുംബൈ: ഭാരത ജോഡോ യാത്രക്കിടെ വീരസവർക്കറെ അപമാനിച്ച് വയനാട് എം പി രാഹുൽ ഗാന്ധി. സവർക്കർ ബ്രിട്ടീഷുകാരെ സഹായിച്ചുവെന്ന് രാഹുൽ ഗാന്ധി ആരോപിച്ചു. സവർക്കർ ബ്രിട്ടീഷുകാർക്ക് സമർപ്പിച്ച ദയാഹർജി എന്ന പേരിൽ മാദ്ധ്യമങ്ങൾക്ക് മുന്നിൽ ഒരു കടലാസ് കഷണവും രാഹുൽ ഉയർത്തിക്കാട്ടി.
അതേസമയം, സവർക്കറെ കുറിച്ചുള്ള രാഹുൽ ഗാന്ധിയുടെ കാഴ്ചപ്പാടിനോട് യോജിക്കാനാവില്ലെന്ന് മഹാരാഷ്ട്ര മുൻ മുഖ്യമന്ത്രി ഉദ്ധവ് താക്കറെ പറഞ്ഞു. രാഹുൽ സവർക്കറെ കുറിച്ച് പറഞ്ഞത് ശരിയായില്ല എന്നും ഉദ്ധവ് പറഞ്ഞു.
രാഹുൽ ഗാന്ധിയുടെ പരാമർശത്തിനെതിരെ രൂക്ഷവിമർശനവുമായി മഹാരാഷ്ട്ര ഉപമുഖ്യമന്ത്രി ദേവേന്ദ്ര ഫഡ്നവിസ് രംഗത്ത് വന്നു. രാഹുൽ നാണമില്ലാതെ നുണ പറയുകയാണ്. വീരസവർക്കറെ അപമാനിച്ചതിനുള്ള മറുപടി രാഹുലിന് ഇന്ത്യയിലെ ജനങ്ങൾ, പ്രത്യേകിച്ച് മഹാരാഷ്ട്രക്കാർ നൽകും. ഒന്നും അത്ര പെട്ടെന്ന് മറക്കുന്നവരല്ല മഹാരാഷ്ട്രയിലെ ജനങ്ങൾ. രാഹുലിന് അത് ഇനിയും ബോദ്ധ്യപ്പെടുമെന്നും ഫഡ്നവിസ് പറഞ്ഞു.
