ന്യൂഡൽഹി: ഖത്തറിൽ നടക്കുന്ന ഫിഫ ലോകകപ്പ് ഉദ്ഘാടന ചടങ്ങിൽ ഉപരാഷ്ട്രപതി ജഗ്ദീപ് ധൻകർ പങ്കെടുക്കും. ഖത്തർ ഭരണാധികാരി അമീർ ഷെയ്ഖ് തമീം ബിൻ ഹമദ് അൽതാനിയുടെ ക്ഷണപ്രകാരമാണ് ദ്വിദിന സന്ദർശനം. നവംബർ 20-21 തീയതികളിലാണ് ധൻകർ ഖത്തർ സന്ദർശിക്കുകയെന്ന് വിദേശകാര്യ മന്ത്രാലയം വ്യക്തമാക്കി.
ലോകകപ്പിന്റെ ഉദ്ഘാടന ചടങ്ങിൽ പങ്കെടുത്തതിന് ശേഷം ഖത്തറിലെ ഇന്ത്യൻ ജനങ്ങളുമായി അദ്ദേഹം സംവദിക്കും. ലോകകപ്പിൽ ഭാരതീയർ വഹിച്ച പങ്കിനെയും പിന്തുണയെയും അംഗീകരിക്കുന്നതിനുള്ള അവസരമായിരിക്കുമിതെന്ന് വിദേശകാര്യ മന്ത്രാലയം വിശദമാക്കി. വ്യാപാരം, ഊർജം, സുരക്ഷ, ആരോഗ്യം, സംസ്കാരം, വിദ്യാഭ്യാസം, പ്രതിരോധം, തുടങ്ങിയ മേഖലകളിൽ ഇന്ത്യ-ഖത്തർ ബന്ധം ദൃഢമാണെന്നും മന്ത്രാലയം പറഞ്ഞു.
ഇന്ത്യ-ഖത്തർ നയതന്ത്ര ബന്ധം സ്ഥാപിതമായിട്ട് 2023-ൽ 50 വർഷങ്ങൾ പിന്നിടും. ഇന്ത്യയുടെ ഊർജ്ജ മേഖലയിൽ പ്രധാന പങ്ക് വഹിക്കുന്ന രാജ്യമാണ് ഖത്തർ. ഗൾഫ് രാജ്യങ്ങളുടെ ഭക്ഷ്യ സുരക്ഷയിൽ ഇന്ത്യയാണ് പ്രധാന പങ്കാളി.
