ജയ്പൂർ: ജനങ്ങളോട് നോട്ടുമാല അണിയിക്കാൻ ആവശ്യപ്പെട്ട് കോൺഗ്രസ് മന്ത്രി. രാജസ്ഥാനിലെ വിദ്യാഭ്യാസ സഹമന്ത്രിയായ സാഹിദ ഖാനാണ് വിചിത്രമായ ആവശ്യം ജനങ്ങൾക്ക് മുന്നിൽ വച്ചത്. കമാൻ മണ്ഡലത്തിൽ നിന്നുള്ള എംഎൽഎയാണ് സാഹിദ ഖാൻ.
ഒരു പരിപാടിക്കെത്തിയ മന്ത്രിയെ പ്രദേശവാസികളും അനുനായികളും ചേർന്ന് പൂക്കൾ കൊണ്ടുള്ള മാല അണിയിച്ച് സ്വീകരിച്ചു. ഈ സമയമാണ് പൂമാല ഒഴിവാക്കി നോട്ടുമാല അണിയിക്കാൻ മന്ത്രി ആവശ്യപ്പെട്ടത്. തുടർന്ന് കോൺഗ്രസ് പ്രവർത്തകർ ഓടിപ്പോയി 500 രൂപയുടെ കറൻസി ഉപയോഗിച്ചുള്ള 51,000 രൂപ മൂല്യമുള്ള മാല അണിയിക്കുകയായിരുന്നു.
ഇതിന്റെ ദൃശ്യങ്ങൾ സമൂഹമാദ്ധ്യമങ്ങളിലൂടെ പുറത്തുവന്നതോടെ ബിജെപി പ്രതിഷേധവുമായി രംഗത്തെത്തി.മുഖ്യമന്ത്രി അശോക് ഗെഹ്ലോട്ട് സംഭവം അന്വേഷിക്കണമെന്നും ഇതാണ് കോൺഗ്രസ് സർക്കാർ ആഗ്രഹിക്കുന്നതെന്നും പൊതുപണം കൊള്ളയടിക്കുന്ന നഗ്നമായ സംഭവമാണിതെന്നും ബിജെപി ആരോപിച്ചു. സംഭവം വിവാദമായതോടെ മന്ത്രിയുടെ തമാശയായിരുന്നു എല്ലാമെന്ന് മന്ത്രിയുടെ ഭർത്താവ് പുറത്തിറക്കിയ പ്രസ്താവനയിൽ വ്യക്തമാക്കി.
Comments