ഹൈദരാബാദ്: ഇന്ത്യൻ സൂപ്പർ ലീഗ് ഫുട്ബോളിൽ കേരള ബ്ലാസ്റ്റേഴ്സിന്റെ തേരോട്ടം തുടരുന്നു. എവേ മത്സരത്തിൽ നിലവിലെ ചാമ്പ്യന്മാരായ ഹൈദരാബാദ് എഫ് സിക്കെതിരെ ഏകപക്ഷീയമായ ഒരു ഗോളിനാണ് ബ്ലാസ്റ്റേഴ്സിന്റെ ജയം. ദിമിത്രിയോസ് ഡിയാമെന്റാക്കോസാണ് ബ്ലാസ്റ്റേഴ്സിന്റെ വിജയ ഗോൾ നേടിയത്.
പതിനെട്ടാം മിനിറ്റിലായിരുന്നു ഡിയാമെന്റാക്കോസിലൂടെ ബ്ലാസ്റ്റേഴ്സിന്റെ വിജയ ഗോൾ പിറന്നത്. പെനാൽട്ടി ബോക്സിന് പുറത്ത് നിന്നും അഡ്രിയാൻ ലൂണ നൽകിയ പന്ത് നിഷുവിന്റെ തന്ത്രപരമായ നീക്കത്തിലൂടെ ഹൈദരാബാദ് ഗോൾ കീപ്പറെ മറികടന്ന് ഡിയാമെന്റാക്കോസിന്റെ കാലിലേക്കെത്തി. സ്വതസിദ്ധമായ ശൈലിയിൽ തകർപ്പൻ ഇടങ്കാൽ ഷോട്ടിലൂടെ ഡിയാമെന്റാക്കോസ് ഹൈദരാബാദിന്റെ ഗോൾ മുഖം തകർത്തു.
അവസാന നിമിഷം വരെ പൊരുതി കളിച്ച ഹൈദരാബാദിനെ പ്രതിരോധക്കോട്ട തീർത്ത് തടഞ്ഞു നിർത്തിയ ബ്ലാസ്റ്റേഴ്സ് ഒടുവിൽ അർഹിക്കുന്ന വിജയം സ്വന്തമാക്കുകയായിരുന്നു. കഴിഞ്ഞ സീസണിലെ ഫൈനലിൽ ഹൈദരാബാദിനോട് പിണഞ്ഞ തോൽവിയുടെ കണക്ക് തീർക്കുന്നതായി ബ്ലാസ്റ്റേഴ്സിന്റെ ഇന്നത്തെ വിജയം. സീസണിലെ ഹൈദരാബാദിന്റെ ആദ്യ തോൽവിയാണ് ഇത്.
