പരിക്കിനെ തുടർന്ന് നടൻ അബ്ബാസ് ആശുപത്രിയിൽ. കാലിന് പരിക്കേറ്റതിനെ തുടർന്നാണ് താരത്തെ ആശുപത്രിയിൽ പ്രവേശിപ്പിച്ചത്. നടനെ ശസ്ത്രക്രിയയ്ക്ക് വിധേയമാക്കി. ശസ്ത്രക്രിയ വിജയകരമായിരുന്നുവെന്നും ഉടൻ ആശുപത്രി വിടുമെന്നും അബ്ബാസ് പറഞ്ഞു. ആശുപത്രിയിൽ നിന്നുള്ള ചിത്രവും സമൂഹമാദ്ധ്യമങ്ങളിൽ താരം പങ്കുവെച്ചു.
‘ആശുപത്രിയിലായിരിക്കുമ്പോഴാണ് ഉത്കണ്ഠ ഏറ്റവും കൂടുതൽ ഉണ്ടാകുന്നത്. മനസ്സിനെ ശക്തിപ്പെടുത്താൻ പ്രയത്നിച്ചുകൊണ്ടിരിക്കുകയാണ്. ശസ്ത്രക്രിയ വിജയകരമായി പൂർത്തിയായി. ഉടൻ വീട്ടിലേക്ക് തിരിച്ചെത്തണം. എല്ലാവരുടെയും പ്രാർത്ഥനകൾക്കും സ്നേഹത്തിനും നന്ദി’ എന്നാണ് അബ്ബാസ് ഫെയ്സ്ബുക്കിൽ കുറിച്ചത്.
കഴിഞ്ഞ ഓഗസ്റ്റിൽ ബൈക്കിൽ നിന്ന് വീണ് താരത്തിന്റ കണങ്കാലിന് പരിക്ക് പറ്റിയിരുന്നു. കാൽമുട്ടിനേറ്റ പരിക്കിന് ഫിസിയോതെറാപ്പി നടത്തിയെങ്കിലും ശസ്ത്രക്രിയ വേണമെന്ന് ഡോക്ടർമാർ നിർദേശിക്കുകയായിരുന്നു. യാത്രകൾ ഏറെ ഇഷ്ടപ്പെടുന്ന വ്യക്തിയാണ് അബ്ബാസ്. യാത്രകളുടെയും ബൈക്ക് റൈഡിന്റെയുമടക്കം വീഡിയോകൾ താരം പങ്കുവെയ്ക്കാറുണ്ട്. കുറച്ചു നാളത്തേയ്ക്ക് ബൈക്ക് റൈഡിൽ നിന്നും ഇടവേള എടുക്കുന്നുവെന്ന് താരം പറഞ്ഞു.
Comments