ന്യൂഡൽഹി : ജയിലിൽ കിടന്ന് താൻ 28 കിലോ ഭാരം കുറഞ്ഞുവെന്ന് ആം ആദ്മി നേതാവും മന്ത്രിയുമായ സത്യേന്ദ്ര ജെയിൻ. ഭക്ഷണമോ മെഡിക്കൽ സൗകര്യങ്ങളോ തനിക്ക് ലഭിക്കുന്നില്ല. എല്ലാ തവണയും താൻ കൂടുതൽ അപമാനിതനാവുകയാണെന്നും മന്ത്രി കോടതിയിൽ വ്യക്തമാക്കി.
ഡൽഹി മന്ത്രിയെ ജയിലിനുള്ളിൽ തിരുമ്മലിനും ഉഴിച്ചിലിനും വിധേയനാക്കുന്ന വീഡിയോ സമൂഹമാദ്ധ്യമങ്ങളിൽ ശ്രദ്ധ നേടിയിരുന്നു. മറ്റ് തടവുകാർ ഇദ്ദേഹത്തെ പരിപാലിക്കുന്ന വീഡിയോയായിരുന്നു അത്. ഇത് വൻ വിവാദങ്ങൾക്ക് വഴിവെച്ചു. ഇതിന് പിന്നാലെയാണ് ആരോപണവുമായി മന്ത്രി രംഗത്തെത്തിയത്. 26/11 മുംബൈ ആക്രമണത്തിന്റെ സൂത്രധാരൻ അജ്മൽ കസബിന് പോലും സ്വതന്ത്രവും നീതിപൂർവ്വവുമായ വിചാരണ നടത്താൻ സാധിച്ചിരുന്നു, എന്നാൽ തനിക്കത് ലഭിക്കുന്നില്ലെന്നാണ് മന്ത്രിയുടെ പരാതി.
നിർണായക വിവരങ്ങൾ പോലും എൻഫോഴ്സ്മെന്റ് ഡയറക്ടറേറ്റ് പുറത്തുവിടുകയാണ്. ജയിലിൽ എന്ത് ആനുകൂല്യം കിട്ടുന്നുവെന്നാണ് നിങ്ങൾ പറയുന്നത്. ജയിലിലായതിന് ശേഷം 28 കിലോ ഭാരം കുറഞ്ഞു. ശരിയായ സമയത്ത് ഭക്ഷണമോ മെഡിക്കൽ സൗകര്യങ്ങളോ ലഭിക്കുന്നില്ല. കോടതിയിൽ അഭിഭാഷകൻ വഴി സമർപ്പിച്ച സബ്മിഷനിലാണ് ഇക്കാര്യം വ്യക്തമാക്കുന്നത്.
പോക്സോ കേസ് പ്രതികൾ ഉൾപ്പെടെ ജയിലിൽ സത്യേന്ദ്ര ജെയിനിന് തടവിക്കൊടുക്കുന്ന വീഡിയോയാണ് പുറത്തുവന്നത്. ഇത് ആം ആദ്മിയെ പ്രതിസന്ധിയിലാക്കിയിരിക്കുകയാണ്. ഈ അവസരത്തിലാണ് ജയിലിലെ തന്റെ അവസ്ഥ വിവരിച്ചുകൊണ്ട് സത്യേന്ദ്ര ജെയിൻ കോടതിയിൽ റിപ്പോർട്ട് സമർപ്പിച്ചത്.
