ജയ്പൂർ: കേന്ദ്ര സർക്കാർ പ്രതിമാസം 16 ലക്ഷം തൊഴിലവസരങ്ങൾ സൃഷ്ടിക്കുന്നുണ്ടെന്ന് റെയിൽവേ മന്ത്രി അശ്വിനി വൈഷ്ണവ്. സെൻട്രൽ റിസർവ് പോലീസ് സേനയുടെ ആഭിമുഖ്യത്തിൽ അജ്മീറിൽ സംഘടിപ്പിച്ച ‘റോസ്ഗർ മേള’യിൽ സംസാരിക്കുകയായിരുന്നു മന്ത്രി. നരേന്ദ്രമോദി നയിക്കുന്ന കേന്ദ്ര സർക്കാരിന് കീഴിൽ വലിയ തരത്തിൽ തൊഴിലവസരങ്ങൾ സൃഷ്ടിക്കപ്പെടുന്നുണ്ടെന്നും സുതാര്യതയാണ് സർക്കാരിന്റെ താക്കോലെന്നും അശ്വിനി വൈഷ്ണവ് പറഞ്ഞു.
ആഗോള സാമ്പത്തിക പ്രതിസന്ധിയുടെ സാഹചര്യത്തിലും ഇന്ത്യ ഊർജ്ജ സ്രോതസ്സായി ഉയർന്നുവന്നു. കേന്ദ്രത്തിന്റെ പദ്ധതികൾ സമൂഹത്തിലെ എല്ലാ വിഭാഗങ്ങളുടെയും ജീവിതം സുരക്ഷിതമാക്കുന്നുണ്ട്. എപ്പോഴും രാജ്യത്തിന് ആദ്യം പ്രാധാന്യം നൽകണമെന്നും യുവാക്കളോട് മന്ത്രി ആഹ്വാനം ചെയ്തു. തങ്ങളുടെ കടമയിൽ യാതൊരു വിട്ടുവീഴ്ചയും ചെയ്യരുത്. എല്ലായ്പ്പോഴും രാഷ്ട്രത്തിനും സമൂഹത്തിനും പ്രാധാന്യം നൽകുന്നവരാണ് ജീവിതത്തിൽ ഉന്നത വിജയം നേടിയിട്ടുള്ളതെന്നും അദ്ദേഹം പറഞ്ഞു.
പ്രധാനമന്ത്രി നരേന്ദ്രമോദിയും ചൊവ്വാഴ്ച വീഡിയോ കോൺഫറൻസിലൂടെ 70,000-ത്തിലധികം യുവാക്കൾക്ക് നിയമന കത്തുകൾ നൽകിയിരുന്നു. രാജ്യത്ത് എൻഡിഎ ഭരിക്കുന്ന സംസ്ഥാനങ്ങളിലും തൊഴിലവസരങ്ങൾ സൃഷ്ടിക്കുന്ന ഇത്തരം പരിപാടികൾ സംഘടിപ്പിക്കുന്നുണ്ടെന്നും പ്രധാനമന്ത്രി പറഞ്ഞു. കഴിഞ്ഞ ഒരു മാസത്തിനുള്ളിൽ മാത്രം മഹാരാഷ്ട്രയിലും ഗുജറാത്തിലും ആയിരക്കണക്കിന് നിയമന കത്തുകൾ കൈമാറി. ഉത്തർപ്രദേശ് സർക്കാരും നിരവധി യുവാക്കൾക്ക് നിയമന കത്ത് നൽകിയിരുന്നു. ജമ്മു കശ്മീർ, ലഡാക്ക്, ആൻഡമാൻ നിക്കോബാർ ദ്വീപുകൾ, ലക്ഷദ്വീപ്, ദാദ്ര നഗർ ഹവേലി, ദാമൻ ദിയു, ചണ്ഡീഗഢ് എന്നിവിടങ്ങളിലും റോസ്ഗർ മേളകൾ സംഘടിപ്പിക്കുകയും ആയിരക്കണക്കിന് യുവാക്കൾക്ക് ജോലി നൽകുകയും ചെയ്തുവെന്നും പ്രധാനമന്ത്രി പറഞ്ഞു.
Comments