ചിരഞ്ജീവി നായകനാകുന്ന ഏറ്റവും പുതിയ ചിത്രമാണ് ‘വാള്‍ട്ടര്‍ വീരയ്യ’. കെ.എസ് രവീന്ദ്ര(ബോബി കൊല്ലി) സംവിധാനം ചെയ്യുന്ന സിനിമയിൽ വ്യത്യസ്ത ഗെറ്റപ്പിലാണ് താരം എത്തുന്നത്. ഇപ്പോൾ, ചിത്രത്തിലെ ‘ബോസ് പാർട്ടി’ എന്ന ഗാനം പുറത്തുവിട്ടിരിക്കുകയാണ് അണിയറ പ്രവർത്തകർ. ദേവി ശ്രീ പ്രസാദ് വരികളെഴുതി ഈണം പകർന്നിരിക്കുന്ന ഗാനം പാടിരിക്കുന്നത് ദേവി ശ്രീ പ്രസാസും നകാഷ് അസീസ്, ഹരിപ്രിയ എന്നിവർ ചേർന്നാണ്. മെഗാസ്റ്റാറിന്റെ ചടുല നൃത്തവുമായി എത്തിയ ഗാനം ചിരഞ്ജീവി ആരാധകർ ഇരു കൈയ്യും നീട്ടി സ്വീകരിച്ചു കഴിഞ്ഞു. ചിരഞ്ജീവിക്കൊപ്പം ഉർവശി റൗട്ടേലയാണ് ‘ബോസ് പാർട്ടി’ ഗാനത്തിൽ ചുവടു വെയ്‌ക്കുന്നത്.
ബോബിയുടേത് തന്നെയാണ് ചിത്രത്തിന്റെ കഥയും സംഭാഷണവും. കോന വെങ്കട്, കെ ചക്രവര്‍ത്തി റെഡ്ഡി എന്നിവര്‍ ചേര്‍ന്നാണ് തിരക്കഥ എഴുതിയിരിക്കുന്നത്. ചിരഞ്ജീവിയ്‌ക്കൊപ്പം രവി തേജ, ശ്രുതി ഹാസൻ, കാതറിൻ ട്രീസ തുടങ്ങിയ വലിയ താരനിരയാണ് ‘വാള്‍ട്ടര്‍ വീരയ്യ’യിൽ അണിനിരക്കുന്നത്. ചിരഞ്ജീവിയുടെ കരിയറിലെ 154-ാം ചിത്രമാണിത്.
മൈത്രി മൂവി മേക്കേഴ്സിന്‍റെ ബാനറില്‍ നവീന്‍ യെര്‍ണേനി, വൈ രവി ശങ്കര്‍ എന്നിവര്‍ ചേര്‍ന്നാണ് ചിത്രം നിർമ്മിക്കുന്നത്. സഹനിര്‍മ്മാണം ജി.കെ മോഹന്‍. ഛായാഗ്രാഹണം- ആര്‍തര്‍ എ വില്‍സണ്‍, ചിത്രസംയോജനം- നിരഞ്‍ജൻ ദേവറാമണെ, സംഘട്ടനം- റാം ലക്ഷ്‍മൺ, പീറ്റർ ഹെയ്ൻ എന്നിവർ നിർവ്വഹിക്കുന്നു.
