ചെവിക്കുള്ളിൽ ഇയർവാക്സ് നിറയുമ്പോൾ ബഡ്സ് ഇട്ട് കുത്തിയെടുക്കുക എന്നത് പലരുടെയും ശീലമാണ്. എന്നാൽ ഒരിക്കലും ചെയ്യരുതാത്ത ഒരു കാര്യമാണിതെന്ന് കൂടി അറിഞ്ഞോളൂ. ചെവി വൃത്തിയാക്കാൻ ഒരിക്കലും ബഡ്സ് ഇട്ട് ഇളക്കുകയോ കുത്തുകയോ ചെയ്യരുത്. ചിലർ സേഫ്റ്റിപിന്നും സ്ലേഡുമൊക്കെ ചെവിക്കുള്ളിൽ കയറ്റി ഇതേ കലാപരിപാടി നടത്താറുണ്ട്. എന്നാൽ ഇത്തരത്തിലുള്ള കൂർത്ത വസ്തുക്കൾ ഒരിക്കലും നാം ചെവിക്കകത്ത് ഇടാൻ പാടില്ലെന്നാണ് ആരോഗ്യവിദഗ്ധർ ചൂണ്ടിക്കാട്ടുന്നത്.
ചെവി വൃത്തിയാക്കുക എന്ന സദുദ്ദേശ്യത്തോടെയാണ് പലരും ബഡ്സ് ഇടുന്നതെങ്കിലും കേൾവി ശക്തി പോലും നഷ്ടപ്പെടുത്താൻ ബഡ്സിന് കഴിയുമെന്നാണ് പറയപ്പെടുന്നത്. അതുമല്ലെങ്കിൽ ചെവിക്ക് അകത്ത് മുറിവ് ഉണ്ടാക്കാനും ബഡ്സ് കാരണമാകും. അത്രമാത്രം സെൻസിറ്റീവായ ചർമ്മമാണ് ചെവിക്കകത്തുള്ളത്. അതുകൊണ്ട് കൂർത്തിരിക്കുന്ന ഒന്നും തന്നെയെടുത്ത് ചെവിക്കുള്ളിൽ ഇളക്കരുത്. ചിലപ്പോൾ ബഡ്സിന് മുകളിലുള്ള പഞ്ഞി ചെവിയിൽ തന്നെയിരിക്കാൻ സാധ്യതയുണ്ട്. ഇത് വലിയ അപകടമാണ്. ബഡ്സ് കൊണ്ട് ഇളക്കി ഏതെങ്കിലും രീതിയിലുള്ള മുറിവ് സംഭവിച്ചുകഴിഞ്ഞാൽ, ചെവിയുടെ ഘടനയുടെ പ്രത്യേകത മൂലം മുറിവ് ഉണങ്ങിവരാൻ പ്രയാസമാകും. ഇത് അണുബാധയ്ക്ക് ഇടയാക്കുകയും ചെവിയുടെ കേൾവിശക്തിയെ ബാധിക്കുകയും ചെയ്തേക്കാം..
കുളി കഴിഞ്ഞ ഉടനെ വൃത്തിയുള്ള നനഞ്ഞ തുണി കൊണ്ട് ചെവി വൃത്തിയാക്കാവുന്നതാണ്. അതുമല്ലെങ്കിൽ ഒരു ഇഎൻടി സ്പെഷ്യലിസ്റ്റിനെ കണ്ട് ഇയർഡ്രോപ്സ് വാങ്ങി ചെവിയിൽ ഒഴിക്കാം. നിറഞ്ഞിരിക്കുന്ന ഇയർവാക്സ് കുതിർന്ന് പുറത്തേക്ക് പോകുന്നതാണ്. എപ്പോഴും സ്വയം ചികിത്സ ഒഴിവാക്കുന്നതാണ് ചെവിയുടെ ആരോഗ്യത്തിന് ഉത്തമം.
കുറച്ചൊക്കെ ഇയർവാക്സ് ചെവിക്കകത്ത് ഇരിക്കുന്നത് നല്ലതാണെന്നും ഡോക്ടർമാർ പറയാറുണ്ട്. അത്യധികം സെൻസിറ്റീവായ ചെവിയുടെ അകത്തേക്ക് പൊടിപടലങ്ങളും അണുക്കങ്ങളും പ്രവേശിക്കാതിരിക്കാൻ ഇയർവാക്സ് സഹായിക്കും. കൂടാതെ പ്രാണികളോ മറ്റ് ചെറിയ എന്തെങ്കിലും വസ്തുക്കളോ ചെവിക്കുള്ളിൽ പോകാതിരിക്കാനും ഇയർവാക്സ് ഗുണം ചെയ്യുമെന്ന് ആരോഗ്യവിദഗ്ധർ പറയുന്നു.
Comments