ന്യൂഡൽഹി: 15 വർഷത്തിന് മുകളിൽ പഴക്കമുള്ള കേന്ദ്ര സർക്കാർ വാഹനങ്ങൾ നിരത്തുകളിൽ നിന്നും പിൻവലിക്കുമെന്ന് കേന്ദ്ര ഉപരിതല ഗതാഗത വകുപ്പ് മന്ത്രി നിതിൻ ഗഡ്കരി. സംസ്ഥാന സർക്കാരുകളോടും കേന്ദ്രം നിലപാട് വ്യക്തമാക്കിയിട്ടുണ്ട്. സംസ്ഥാനങ്ങളും തങ്ങളുടെ പരിധിയിൽ വരുന്ന 15 വർഷത്തിന് മുകളിൽ പഴക്കമുള്ള ബസുകൾ, ട്രക്കുകൾ, കാറുകൾ എന്നിവ നിരത്തുകളിൽ നിന്നും പിൻവലിക്കണമെന്നും കേന്ദ്ര മന്ത്രി നിർദേശിച്ചു.
പരിസ്ഥിതി- ഊർജ്ജ സംരക്ഷണത്തിന്റെ ഭാഗമായും വാഹനപ്പെരുപ്പം കുറയുക്കുന്നതിന് വേണ്ടിയുമാണ് 15 വർഷത്തിന് മുകളിൽ പഴക്കമുള്ള വാഹനങ്ങൾ നിരത്തുകളിൽ നിന്ന് പിൻവലിക്കണമെന്ന് കേന്ദ്ര സർക്കാർ നിർദേശം നൽകിയത്. മിക്ക സംസ്ഥാനങ്ങളും ഇതിനോട് അനുകൂലമായി പ്രതികരിച്ചപ്പോൾ, ചില സംസ്ഥാനങ്ങൾ നിർദേശം പാലിക്കാൻ വിമുഖത കാട്ടിയിരുന്നു.
പഴയ വാഹനങ്ങൾ പൊളിക്കുന്നതിനുള്ള കേന്ദ്രങ്ങൾ സ്ഥാപിക്കാൻ സംസ്ഥാനങ്ങൾക്ക് സഹായം നൽകുമെന്നും നിതിൻ ഗഡ്കരി അറിയിച്ചു. രാജ്യത്തെ എല്ലാ ജില്ലകളിലും ഇതിനായി ശരാശരി 2 കേന്ദ്രങ്ങൾ വരെ തുറക്കും. പൊളിക്കുന്ന വാഹനങ്ങളിലെ പഴയ ടയറുകൾ ഉൾപ്പെടെയുള്ളവ റോഡ് നിർമ്മാണത്തിന് ഉപയോഗിക്കുമെന്നും അദ്ദേഹം അറിയിച്ചു.
