എറണാകുളം : തരൂരുമായി വേദി പങ്കിടുന്നത് ഒഴിവാക്കി സുധാകരൻ.നാളെ കൊച്ചിയിൽ നടക്കുന്ന പ്രൊഫഷണൽ കോൺഗ്രസ് കോൺക്ലേവിന് കെ പി സി സി പ്രസിഡന്റ് കെ സുധാകരൻ എത്തില്ല.ആരോഗ്യ കാരണങ്ങളാലാണ് നേരിട്ട് വരാത്തതെന്നും, ഓൺലൈനായി പങ്കെടുക്കുമെന്നും സംഘാടകർ അറിയിച്ചു.
. കൊച്ചിയിൽ നാളെ രാവിലെ ഒൻപതരയ്ക്ക് നടക്കുന്ന പ്രൊഫഷണൽ കോൺഗ്രസ് കോൺക്ലേവിന്റെ ഉദ്ഘാടകനായി കെ സുധാകരനെയും, മുഖ്യ പ്രഭാഷകനായി സംഘടന ദേശീയ ചെയർമാൻ കൂടിയായ ശശി തരൂരിനെയുമായിരുന്നു സംഘാടകർ നിശ്ചയിച്ചിരുന്നത്.കെ സുധാകരനും, ശശി തരൂരും ഒരുമിച്ച് വേദി പങ്കിടുന്ന പരിപാടിയെന്ന നിലയിൽ കോൺക്ലേവ് രാഷ്ട്രീയ ശ്രദ്ധാകേന്ദ്രമായിരുന്നു നാളത്തെ കോൺക്ലേവ്.
സംസ്ഥാന രാഷ്ട്രീയത്തിൽ സജീവമാകുമെന്ന സൂചനകൾ നൽകി വിവിധ ജില്ലകളിൽ തരൂർ പൊതുപരിപാടികൾക്കെത്തിയതോടെ കെ പി സി സി തരൂരിന് മേൽ നിയന്ത്രണങ്ങൾ കടുപ്പിച്ചിരുന്നു. ഡി സി സി കളുടെ അനുമതിയില്ലാതെ നേതാക്കൾ പൊതുപരിപാടികളിൽ പങ്കെടുക്കരുതെന്ന് കോൺഗ്രസ് അച്ചടക്ക സമിതി നിർദേശിച്ചിരുന്നു.
പാർട്ടി ചട്ടക്കൂട് പൊളിക്കാതെയും, അച്ചടക്കം ലംഘിക്കാതെയും മുന്നോട്ടു പോകണം. ഇതിനിടെയായിരുന്നു കൂടുതൽ സംഘടനകൾ ശശി തരൂരിനെ പൊതുപരിപാടികൾക്ക് ക്ഷണിക്കുന്നത്. പരിപാടിയിൽ വിട്ടു നിൽക്കാൻ തീരുമാനിച്ച കെ സുധാകരൻ പിന്നീട് സംഘാടകർ ബന്ധപ്പെട്ടപ്പോൾ ഓൺലൈനായി പങ്കെടുക്കാമെന്ന് അറിയിക്കുകയായിരുന്നു.തിരുവനന്തപുരത്ത് നടത്താൻ നിശ്ചയിച്ച സമ്മേളനം നേതാക്കളുടെ അസൗകര്യം കാരണം കൊച്ചിയിലേക്ക് മാറ്റുകയായിരുന്നു.പ്രതിപക്ഷ നേതാവ് വി ഡി സതീശനും കോൺക്ലേവിൽ പങ്കെടുക്കുന്നുണ്ട്. വൈകീട്ട് നടക്കുന്ന ലീഡേഴ്സ് മീറ്റിനാണ് വി ഡി സതീശനെ ക്ഷണിച്ചിരിക്കുന്നത്.
Comments