തിരുവനന്തപുരം: വിഴിഞ്ഞം തുറമുഖത്തിന്റെ പേരിൽ നാട്ടിൽ അക്രമം അഴിച്ചു വിടാനുള്ള ഗൂഢ നീക്കത്തിനെതിരെ ഹിന്ദു ഐക്യവേദിയുടെ നേതൃത്വത്തിൽ ബഹുജനമാർച്ച്. നവംബർ 30 ബുധനാഴ്ച വൈകുന്നേരം 4 മണിക്കാണ് ബഹുജന മാർച്ച് സംഘടിപ്പിക്കുക. വിഴിഞ്ഞത്തെ മുക്കോലയിൽ നിന്നും ആരംഭിക്കുന്ന മാർച്ച് ഹിന്ദു ഐക്യവേദി സംസ്ഥാന പ്രസിഡൻ്റ് കെ.പി.ശശികല ടീച്ചർ ഉദ്ഘാടനം ചെയ്യും.
വിഴിഞ്ഞം തുറമുഖം യാഥാർത്ഥ്യമാക്കുക, ഹൈക്കോടതി ഉത്തരവ് നടപ്പാക്കുക, പോലീസിന്റെ ഒത്താശയിൽ കലാപകാരികൾ നടത്തുന്ന അക്രമം അവസാനിപ്പിക്കുക എന്നിങ്ങനെ ആവശ്യങ്ങൾ ഉന്നയിച്ചു കൊണ്ടാണ് ഹിന്ദു ഐക്യവേദി ബഹുജന മാർച്ച് സംഘടിപ്പിക്കുന്നത്. വിഴിഞ്ഞം പദ്ധതി പൂർത്തിയാക്കണമെന്ന് ആവശ്യപ്പെട്ട് പ്രദേശവാസികൾ സംഘടിപ്പിച്ച സമരത്തിന് ഹിന്ദു ഐക്യവേദി പൂർണ്ണ പിന്തുണ നൽകിയിരുന്നു. വിവിധ സമൂഹിക സംഘടനകളും ഹിന്ദു ഐക്യവേദി സംഘടിപ്പിക്കുന്ന ബഹുജന മാർച്ചിൽ പങ്കെടുക്കും.
അതേസമയം, വിഴിഞ്ഞം തുറമുഖത്തിനെതിരെ നടക്കുന്നത് രാജ്യവിരുദ്ധ സമരമാണെന്ന് ബിജെപിയും പറഞ്ഞു. എന്തിനും സന്നദ്ധരായ, ഒരു നിയന്ത്രണവുമില്ലാത്ത ആൾക്കൂട്ടത്തെ ഉപയോഗിച്ച് ജനാധിപത്യ സംവിധാനത്തെ മുഴുവൻ വെല്ലുവിളിക്കുകയാണ് വിഴിഞ്ഞത്തെ സമര നേതൃത്വം. സംഭവിക്കില്ലെന്ന് ഉറപ്പുള്ളൊരു കാര്യം പ്രധാന ഉപാധിയായി വച്ചു കൊണ്ട് നടക്കുന്ന സമരത്തിന്റെ ഉദ്ദേശ്യങ്ങൾ നിഗൂഢമാണെന്നും ബിജെപി വ്യക്തമാക്കി.
Comments